ამერიკის შეერთებული შტატების პრეზიდენტმა ბარაკ ობამამ, ფილადელფიაში, ჰილარი კლინტონის მხარდასაჭერად გამართული დემოკრატიული პარტიის კამპანიისას, რესპუბლიკური პარტიის საპრეზიდენტო კანდიდატი დონალდ ტრამპი გააკრიტიკა.

ობამას თქმით, საშიშია, როცა ამერიკის პრეზიდენტობის კანდიდატისთვის ვლადიმერ პუტინი მისაბაძი მაგალითია.

"დონალდ ტრამპი ადიდებს პუტინს და მას ძლიერ ლიდერს უწოდებს, მაშინ როცა პუტინი იპყრობს მასზე პატარა ზომის ქვეყნებს, ციხეში სვამს ოპონენტებს, აკონტროლებს მედიას და ქვეყნის ეკონომიკას ანადგურებს".

რამდენიმე დღის წინ, დონალდ ტრამპმა განაცხადა, რომ ვლადიმერ პუტინი უკეთესი ლიდერია, ვიდრე ბარაკ ობამა:

"მასში ლიდერის მრავალი თვისებაა, მას თავის ქვეყანაზე ძლიერი კონტროლი აქვს. [...] თავის სისტემაში ის ბევრად უფრო ძლიერი ლიდერია, ვიდრე ჩვენი პრეზიდენტი, ბარაკ ობამა".

ობამას თქმით, მას მხოლოდ საგარეო პოლიტიკის ფარგლებში აქვს ურთიერთობა რუსეთთან:

"მე მაქვს საქმე პუტინთან, ისევე როგორც რუსეთთან, მაგრამ არ ვამბობ, რომ პუტინი მისაბაძი მაგალითია. შეგიძლია წარმოიდგინოთ, რომ რონალდ რეიგანი ოდესმე მსგავსი რამის იდეალიზაციას მოახდენდა?"