ანა ბაგრატიონ-გრუზინსკის თქმით, მისი მიზანია სიმართლის დამტკიცება. ანა ბაგრატიონმა რამდენიმესაათიანი დაკითხვის შემდეგ დატოვა თბილისის სამმართველო, სადაც გამომძიებლებს მისი ყოფილი ქმრის, დავით ბაგრატიონ-მუხრანელის მხრიდან სავარაუდო ძალადობაზე ისაუბრა.

როგორც ბაგრატიონმა ჟურნალისტებს განუცხადა, სამხარაულის ექსპერტიზის დასკვნა ერთ-ერთ საქმეში იყო და "სიტუაციამ ამოატივტივა". მისივე თქმით, გამოკითხვა არ დასრულებულა

ბაგრატიონის ინტერესებს ორგანიზაცია საფარი იცავს. ორგანიზაციის განცხადებით, ანას მიმართ ყოფილი ქმრის მიერ ჩადენილია სისტემატური ძალადობა და იკვეთება სხვადასხვა დანაშაულის ნიშნებიც.

ანა ბაგრატიონ-გრუზინსკი და დავით ბაგრატიონ-მუხრანელი 2009 წელს დაქორწინდნენ და ოთხი წლის შემდეგ განქორწინდნენ.

შესაძლო ძალადობასთან დაკავშირებით ანა ბაგრატიონის ადვოკატმა, ლევან გორელაშვილმა პირველად ნანუკა ჟორჟოლიანის შოუში ისაუბრა. მან აღნიშნა, რომ 2014 წელს ანა ბაგრატიონს ყოფილი ქმარი ფიზიკურად არასრულწლოვანი შვილის თანდასწრებით გაუსწორდა. ადვოკატის თქმით, მისი კლიენტის დაზიანებები აღნიშნულია სამხარაულის ექსპერტიზის დასკვნაში.

დავით ბაგრატიონ-მუხრანელის ადვოკატი, ლევან ჩხეიძე ბრალდებებს უარყოფს და მას "შავ პიარკამპანიას უწოდებს". მისივე თქმით, ძალადობის არსებობის შემთხვევაშიც საქმეს ხანდაზმულობის ვადა აქვს გასული.

ბაგრატიონების სასამართლო დავა

ანა და ნუგზარ ბაგრატიონ-გრუზინსკებმა დავით ბაგრატიონ-მუხრანელს სასამართლოში უჩივლეს. გრუზინსკები მუხრანელს საქართველოს სამეფო სახელის უნებართვოდ გამოყენებაში ედავება. გრუზინსკები ამბობენ, რომ ისინი არიან სამეფო გვარის ძირითადი შტო, შესაბამისად სამეფო ტახტის მემკვიდრეები, რასაც მუხრანელის მხარე ეწინააღმდეგება.

დავის სირთულიდან გამომდინარე, თბილისის საქალაქო სასამართლო დავას განიხილავს კოლეგიური (სამი მოსამართლის) შემადგენლობით – მაია გიგაური (თავმჯდომარე), თამარ ლაკერბაია, გიორგი გოგიჩაშვილი.

ამავე დროს, დავით ბაგრატიონ-მუხრანელის ადვოკატი, ლევან ჩხეიძე ითხოვს, რომ წარმომავლობის დასამტკიცებლად მხარეებმა დნმ კვლევა ჩაიტარონ, რაზეც გრუზინსკები უარს ამბობენ