იუსიტიციის მინისტრი, თეა წულუკიანი აღიარებს, რომ გუშინ, 20 მარტს ნაციონალური მოძრაობის წევრ თინა ბოკუჩავასთან დაკავშირებით გაკეთებული სექსისტური განცხადება "კარგი არ იყო". ამის შესახებ წულუკიანმა პარლამენტში განაცხადა.

"მე ვთქვი, რომ თქვენი განცხადებები გუშინ იყო ზედაპირული, მაგრამ თქვენ ლამაზი ქალი ხართ. ეს არ არის კარგი განცხადება, ვაღიარებ ამ ტრიბუნიდან, მაგრამ თქვენ ხართ ლამაზი ქალი და თქვენ ხართ განათლებული ქალი, ვასწორებ ჩემს გამოსვლას", — უთხრა წულუკიანმა ბოკუჩავას.

გუშინ პარლამენტში ჟურნალისტებთან საუბრისას თეა წულუკიანმა თინა ბოკუჩავაზე სექსისტური განცხადება გააკეთა.

"ქალბატონი თინა ძალიან ბევრ უსაფუძვლო განცხადებას აკეთებს და ამავე დროს, ის ძალიან ლამაზი ქალია", — განაცხადა წულუკიანმა ბოკუჩავაზე, რომელმაც თქვა, რომ იუსტიციის მინისტრი გახმაურებულ საქმეებზე გარკვეულ ინფორმაციებს ფლობს, რითიც ბიძინა ივანიშვილს აშანტაჟებს.