საქართველოს პრეზიდენტის პრესსპიკერის, ხატია მოისწრაფიშვილის განცხადებით, სალომე ზურაბიშვილის აზრით, აუცილებელია ქვეყანაში ბიზნესი იყოს დაცული და მას თავისუფლად მუშაობის საშუალება ჰქონდეს. ამის შესახებ მან მამუკა ხაზარაძეზე დასმულ კითხვასთან დაკავშირებით განაცხადა.

"მიმდინარეობს ძალზე მწვავე პროცესი და აუცილებელია ამ პროცესში არცერთი კითხვა არ დარჩეს პასუხგაუცემელი", — თქვა მოისწრაფიშვილმა.

ჟურნალისტის კითხვას, აქვს თუ არა სალომე ზურაბიშვილს ამ საქმესთან დაკაშირებით კითხვები, მოისწრაფიშვილი ასე პასუხობს:

"კითხვები აქვს საზოგადოებას და ამ კითხვებზე პასუხი უნდა იქნას გაცემული".

გუშინ, 4 მარტს პარლამენტში თიბისის დამფუძნებლებს, მამუკა ხაზარაძესა და ბადრი ჯაფარიძეს მოუსმინეს. ამ სხდომაზე მამუკა ხაზარაძემ განაცხადა, რომ არჩევნების წინ მაღალჩინოსანმა წერილი მიწერა, რომლის მიხედვითაც მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყნისა და საერთაშორისო ასპარეზზე. შემდგომში ხაზარაძემ განმარტა, რომ ეს წერილი გახარიასგან მიიღო. ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო.

გარდა ამისა, ხაზარაძემ განაცხადა, რომ ეროვნული ბანკის პრეზიდენტი და მისი მოადგილე აშანტაჟებდნენ. ის ორივე მათგანის პასუხისმგებლობის დაყენებას ითხოვს.