ევროპული საქართველოს ლიდერის, ოთარ კახიძის თქმით, ხორავას ქუჩის საქმეზე დანაშაულის შეუტყობინებლობისთვის დაკავებულ მირზა სუბელიანს განაჩენი მასთან შეთანხმებული იყო. ამის შესახებ დეპუტატმა პარლამენტის პლენარულ სხდომაზე განაჩენის გამოცხადების მეორე დღეს, დღეს 5 მარტს განაცხადა.

კახიძემ ის აუდიოჩანაწერი გაიხსენა, სადაც, სავარაუდოდ, სუბელიანი ამბობდა, რომ მისთვის ერთწლიანი პატიმრობა შეეფარდებინათ.

"მეგობრებო, ეს არ არის უბრალო საქმე და არ გქონდეთ ილუზია, რომ ამ ტიპის ჩაფარცხვა რაიმეს შედეგს მოიტანს გრძელვადიან პერიოდში. სამართალი ურმით დადის და მიდგება ყველას, ვინც მოზარდების საქმეს ფარცხავს დღემდე", — განაცხადა კახიძემ.

გუშინ, 4 მარტს თბილისის საქალაქო სასამართლომ მირზა სუბელიანს ბრალი გადააკვალიფიცირა და დანაშაულისთვის პატიმრობა ერთი წლითა და ერთი თვით ვადით შეუფარდა.