საქართველოს პარლამენტმა ბიუროს სხდომაზე ეკა ბესელიასა და კიდევ 8 დეპუტატის საკანონმდებლო ინიციატივის დაჩქარებულ განხილვას მოსამართლეების უვადოდ დანიშვნის პროცესის დროებით შეჩერებაზე მხარი დაუჭირა. გადაწყვეტილება ბიურომ ხმათა უმრავლესობით მიიღო. საკითხის კენჭისყრაზე ბიუროს სხდომაზე კანონპროექტის ავტორმა ეკა ბესელიამ სპეციალური წერილის საფუძველზე დააყენა.

ეკა ბესელია აცხადებს, რომ იუსტიციის საბჭო აგრძელებს მოსამართლეების უვადოდ დანიშვნას თანამდებობაზე, რაც მათი მხრიდან ინსტიტუციური უპატივცემულობაა.

ეკა ბესელიას თქმით, მათ მოითხოვეს კანონპროექტის არა დაჩქარებულ, არამედ შემჭიდროვებულ ვადებში განხილვა. ის ფიქრობს, რომ მნიშვნელოვანია კანონპროექტის განხილვა მიმდინარე სასესიო კვირაში დაიწყოს.

"თუ ამ საკითხის სერიოზულობას სიღრმეს და მასშტაბს ვაცნობიერებთ, მინიმუმ ის მაინც უნდა გავაკეთოთ, რომ გამოვხატოთ ჩვენი აზრით დავუჭერთ თუ არა ამ კანონპროექტს მხარს შემჭიდროვებულ ვადაში", — განაცხადა ეკა ბესელიამ.

მისი თქმით, პირველი მოსმენით კენჭისყრიდან გამოჩნდება არის თუ არა მზად პარლამენტი დაუჭიროს მხარი ამ კანონპროექტს.

"კონსტიტუციურობის ტესტს ყველა კანონპროექტი გადის იმ დოზით, რა დოზითაც საჭიროა ეს პარლამენტში", — თქვა ბესელიამ.

იურიდიულ საკითხთა კომიტეტის ახალი თავმჯდომარე ანრი ოხანაშვილი, ეკა ბესელიამ იმ გაცხადებას გამოეხმაურა, სადაც ბესელიამ თქვა, რომ კანონპროექტი სამი კვირაა პარლამენტშია დარეგისტრირებული. ანრი ოხანაშვილის თქმით, კომიტეტს ეს საკითხი 11 თებერვალს დაეწერა.

"არავის არ აქვს სურვილი, რომ ეს კანონპროექტი გავაჭიანუროთ, საჯაროდ შემოგთავაზეთ შევიკრიბოთ და ვიმსჯელოთ. შემოგთავაზეთ, რომ კაჭრეთში გასვლით შეხვედრაზე გვემსჯელა ამ საკითხზე და ეს შემოთავაზება ძალაშია. ჩემი ინტერესია, რომ ეს კანონპროექტი გონივრულ ვადაში განვიხილოთ. დაჩქარებული წესით განხილვა არ ყოფილა მოთხოვნილი თავიდან, თუმცა ვიმსჯელოთ, გუნდის შიგნით გავიაროთ ეს დოკუმენტი და წარვადგინოთ კომიტეტზე განსახილველად", — განაცხადა ანრი ოხანაშვილმა.

ბესელიამ ანრი ოხანაშვილს შეუსწორა, რომ მან თქვა "არა სამი არამედ მესამე კვირა". დეპუტატმა განმარტა, რომ მესამე კვირაა საკითხი პარლამენტშია. ბესელიას თქმით, სწორედ, იმიტომ არ მოითხოვეს დაჩქარებული წესით განხილვა ამ კანონპროექტის, რომ "პატივი სცეს კოლეგებს, რომლებსაც სჭირდებოდათ გარკვეული დრო".

"გასვლით სამუშაო შეხვედრაზე არ იყო დღის წესრიგში მოსამართლეების საკითხი და არავინ არ შემხმიანებია, რომ ამ თემაზე უნდა გვესაუბრა. კამერებით არ უნდა მესაუბრებოდეს კომიტეტიდან არავინ. ვიღაცას უნდა ეთქვა, რომ ამ საკითხზეა განხილვა და მოდი, შევხვდეთ. კაჭრეთშიც შემიძლია მოჭარბებული ჟანგბადის ფონზე განვიხილო და უფრო ნაკლები ჟანგბადის ფონზე თბილისშიც, რუსთაველზე. ამისთვის მზად ვიყავი, მაგრამ არავის უთქვამს, მოდი, ვისაუბროთ ამ საკითხზე", — განაცხადა ბესელიამ.

ნაციონალური მოძრაობის დეპუტატის, რომან გოცირიძის თქმით, ისინი მხარს უჭერენ ამ საკითხის დაჩქარებული წესით განხილვას.

"სასამართლოების საკითხი მთელი ქვეყნის სატკივარი და მსჯელობის საკითხია და მხოლოდ უმრავლესობის გადასაწყვეტი არაა", — განაცხადა გოცირიძემ.

ქართული ოცნების დეპუტატის ლევან გოგიჩაიშვილის თქმით, ეს პროცესი პოლიტიკურია, რომელსაც ის მუქ ფერებში ხედავს.

"უმძიმესი მოცემულობაა სასამართლოს კუთხით. კითხვის ნიშნის ქვეშ დგას რეფორმა, რომელიც ქართულმა ოცნებამ დაიწყო. ჩვენ ვუყურეთ მოსამართლეების მანტიის გახდას და პოლიტიკურ პროცესში შემოსვლას", — განაცხადა გოგიჩაიშვილმა.

მისი თქმით, იუსტიციის უმაღლესი საბჭო მოსამართლეების უვადოდ დანიშვნას ბოროტად იყენებს.

იურიდიულ საკითხთა კომიტეტის ყოფილმა თავმჯდომარემ, ეკა ბესელიამ ქართული ოცნების 8 დეპუტატთან ერთად კანონპროექტი მოამზადა. ამ კანონპროექტის მიხედვით, მოსამართლეების უვადოდ დანიშნა დროებით უნდა შეჩერდეს და ე.წ. მორატორიუმი უნდა გამოცხადდეს. ბესელია ამ კანონპროექტის დაჩქარებული წესით განხილვას ითხოვდა. ქართული ოცნების დეპუტატების ნაწილი აცხადებს, რომ კანონპროექტის კონსტიტუციურობასთან დაკავშირებით კითხვები აქვს, ბესელია კი ამბობს, რომ მან იცის კანონის წერა და ასეთ ბრალდებებზე კომენტარს არ გააკეთებს.

უმრავლესობის დეპუტატების გარდა, ეკა ბესელიას ინიციატივა იუსტიციის საბჭოს მოსამართლე წევრებმაც გააკრიტიკეს. მოსამართლეები სერგო მეთოფიშვილი და დიმიტრი გვრიტიშვილი ფიქრობენ, რომ კანონპროექტი ეწინააღმდეგება კონსტიტუციას, არის დისკრიმინაციული და ანტისახელმწიფოებრივი, ასევე ეწინააღმდეგება საერთაშორისო სტანდარტებს და პრაქტიკას.

2019 წელს ახალი კონსტიტუციის მიხედვით, უზენაეს სასამართლოში დამატებით 18 უვადო მოსამართლე უნდა დაინიშნოს.