საქართველოს მართლმადიდებელი ეკლესიის საპატრიარქოს პრესცენტრის ხელმძღვანელი მამა ანდრია ჯაღმაიძე ღუდუშაურის კლინიკაში ე.წ. ციანიდის საქმეზე მსჯავრდებული დეკანოზის მოსანახულებლად მივიდა. მან ჟურნალისტებთან საუბრისას თქვა, რომ ნებისმიერ მოძღვარს შეუძლია გიორგი მამალაძის ზიარება, ვინც გადაწყვეტს, რომ მისი სულიერი მდგომარეობა შესაფერისია ამისთვის.

"მისი ემოციური მდგომარეობა რა თქმა უნდა მძიმეა, განსაცდელი მასზე, მის ოჯახზე დიდია და არც შეიძლება, რამე სხვა ველოდებოდეთ... მე მქონდა მამა ნიკოლოზთან ურთიერთობა ზიარებასთან დაკავშირებით და მე როგორც ვიცი, უახლოეს პერიოდში ის აპირებს რომ მოინახულოს".

დეკანოზი გიორგი მამალაძე საავადმყოფოში გუშინ, 15 თებერვალს გადაიყვანეს. ექიმი თქმით, პაციენტი ინტენსიურ განყოფილებაში რჩება შემდგომი მონიტორინგისთვის.

"მისი ცნობიერება ნათელია, ადეკვატურია, კონტაქტურია, მაგრამ ასეთ მწვავედ გამოვლენილ ჩივილს ესაჭიროება ინტენსიური მეთვალყურეობა", — განმარტავს ექიმი.

6 თებერვალს ცნობილი გახდა, რომ გიორგი მამალაძეს თავისი მოძღვარი დეკანოზი ნიკოლოზ გიგატაძე აზიარებს.

შემთხვევის შემდეგ გიორგი მამალაძის ოჯახმა 17 თებერვალს, 12 საათზე საპროტესტო აქცია დააანონსა საპატრიარქოსთან. დეკანოზის ძმა თორნიკე მამალაძე საზოგადოებას მხარდაჭერისკენ მოუწოდებს. ზიარების მოთხოვნით მას დღემდე საპატრიარქოს შენობის წინ კარავი აქვს გაშლილი.

დეკანოზის ოჯახის წევრების აქცია საპატრიარქომ ეკლესიაზე ზეწოლად შეაფასა. თუმცა, პატრიარქმა გადაწყვიტა დეკანოზის ზიარების უფლება მისცეს იმ მღვდელმსახურებს, ვინც "პასუხისმგებლობას" მხოლოდ საკუთარ თავზე აიღებენ.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.