საქართველოს ახალგაზრდა იურისტთა ასოციაცია იუსტიციის უმაღლეს საბჭოსა და დამოუკიდებელ ინსპექტორს მოსამართლე დიმიტრი გვრიტიშვილის წინააღმდეგ საჩივრით მიმართავს. ამის შესახებ ორგანიზაციის მიერ გავრცელებულ განცხადებაშია ნათქვამი.

საია-ს ცნობით, დიმიტირი გვრიტიშვილის ბოლო დროინდელი საჯარო განცხადებები სამოსამართლო ეთიკის წესებს არღვევს და მოსამართლის დისციპლინურ პასუხისგებაში მიცემის საფუძველია. ორგანიზაციას მაგალითად გვირიტიშვილის მიერ სოციალურ ქსელში ბოლო დროს გავრცელებული განცხადებები მოჰყავს.

საია მიიჩნევს, რომ ეს განცხადებები არაკორექტული, შეურაცხმყოფელი ან დამამცირებელია, არ ემსახურება სამსჯელო საკითხზე საგნობრივი პასუხის გაცემის მიზანს, არ არის რაიმე ღირებულების მატარებელი დემოკრატიულ საზოგადოებაში.

"აღნიშნულით, დიმიტრი გვრიტიშვილი არღვევს საერთო სასამართლოების შესახებ საქართველოს ორგანული კანონის 751-ე მუხლის მეორე პუნქტის "გ" ქვეპუნქტსა და სამოსამართლო ეთიკის წესების მე-19 მუხლს", — ნათქვამია საია-ს განცხადებაში.

საია ასევე ხაზს უსვამს დიმიტრი გვრიტიშვილის განცხადებების პოლიტიკურ შინაარსს და მიაჩნია, რომ ეს არის ღია მხარდაჭერა მოქმედი პოლიტიკური ხელისუფლების მიმართ.

"ეს განცხადებები საერთაშორისო ორგანიზაციებისა და ადგილობრივი არასამთავრობო ორგანიზაციების, მათი ანგარიშების დისკრედიტაციაა", — ვკითხულობთ განცხადებაში.

საია-ს განცხადებაში ასევე გაკრიტიკებულია დიმიტრი გვრიტიშვილის საჯარო განცხადება, რომ ის წელიწადზე მეტია არ განიხილავს დავებს და შესაბამისად არ ახორციელებს სამოსამართლო ფუნქციას.

"დიმიტრი გვრიტიშვილი ვალდებულია დაიცვას კანონის და სამოსამართლო ეთიკის ნორმების ზემოთ აღნიშნული მოთხოვნები მიუხედავად იმისა, მოქმედებს ის როგორც მოსამართლე, სასამართლოს თავმჯდომარე თუ იუსტიციის უმაღლესი საბჭოს წევრი, სასამართლოში საქმის განხილვისას თუ მის მიღმა, სასამართლოს ტერიტორიაზე თუ მის გარეთ, სამუშაო თუ არასამუშაო დროს",— აცხადებენ საია-ში.