"საქართველოსთვის ვიზალიბერალიზაციის მინიჭების შესახებ გადაწყვეტილებას ევროკავშირის წევრი ქვეყნების ელჩები სავარაუდოდ 14 სექტემბერს მიიღებენ, ხოლო საბოლოო გადაწყვეტილება 8 ოქტომბრის საპარლამენტო არჩევნების შემდეგ გახდება ცნობილი, როდესაც იუსტიციისა და შინაგან საქმეთა მინისტრთა საბჭო გამართავს შეხვედრას, 13-14 ოქტომბერს, ლუქსემბურგში", - ამის შესახებ რადიო თავისუფლების ბრიუსელის ბიუროს კორესპონდენტი რიკარდ იოზვიაკი ტვიტერის საკუთარ გვერდზე წერს:

5 სექტემბერს, თბილისის დროით დაახლოებით 19:30 საათზე, ევროპარლამენტის მართლმსაჯულებისა და სამოქალაქო საკითხების კომიტეტში (LIBE) საქართველოსთვის ვიზალიბერალიზაციის მინიჭებაზე კენჭისყრა გაიმართება. ამის შესახებ კომიტეტის განრიგში წერია. მომხსენებელი იქნება ევროპარლამენტარი მარია გაბრიელი.

პროცესის დადებითად წარმართვის შემთხვევაში, საქართველოსთვის უვიზო რეჟიმის მინიჭების საკითხს ევროპარლამენტის პლენარულს სხდომაზე გაიტანენ. საბოლოო გადაწყვეტილების დასამტკიცებლად, ასევე საჭიროა ევროკავშირის საბჭოს თანხმობაც.