ბერლინში, საქართველოს საგარეო საქმეთა მინისტრის მიხეილ ჯანელიძის სამუშაო ვიზიტისას, გერმანიის შინაგან საქმეთა ფედერალური მინისტრის მოადგილემ ემილი ჰამბერმა განაცხადა რომ გერმანია დაინტერესებულია, ქვეყანამ მიიღოს ევროკავშირთან უვიზო მიმოსვლის რეჟიმი. მისივე თქმით, ისინი აფასებენ საქართველოს პროგრესს ვიზალიბერალიზაციის პროცესში. ამის შესახებ საგარეო უწყებამ 3 სექტემბერს განცხადება გაავრცელა.

განცხადებაში წერია, რომ შეხვედრაზე გერმანულმა მხარემ კიდევ ერთხელ გამოხატა საკუთარი მხარდაჭერა საქართველოს მიმართ:

"მინისტრის მოადგილემ სანიმუშო უწოდა ქართველ სამართალდამცავებთან თანამშრომლობის პრაქტიკას, რაც მისი განცხადებით ბევრი მიმართულებით, განსაკუთრებით კი ორგანიზებული დანაშაულის წინააღმდეგ ბრძოლაში წარმატებული გამოდგა".

გერმანულ მხარესთან შეხვედრაზე საუბარი ასევე შეეხო საქართველოს ოკუპირებულ რეგიონებში არსებულ ვითარებას, მინისტრმა ინფორმაცია მიაწოდა გერმანულ მხარეს ოკუპირებულ რეგიონებში ადამიანის უფლებების დარღვევის გახშირებულ ფაქტებზე.