გურჯაანის რაიონული სასამართლოს წინ მიმდინარე აქციას ევროპული საქართველოს ლიდერები, გიგი უგულავა და სერგო რატიანი შეუერთდნენ. გიგი უგულავას თქმით, ადგილზე მობილიზებული პოლიციის სიმრავლიდან ჩანს, თუ რა გადაწყვეტილება შეიძლება მიიღოს სასამართლომ.

"ის ფაქტი, რომ არ ჩაატარეს გუშინ და ჩაატარებენ დღეს დილით, იმაზე მეტყველებს, რომ გადაწყვეტილება აქ არ მიიღება სასამართლოში და გადაწყვეტილება მიღებულია. გადაწყვეტილება შემდეგია, იმის ნაცვლად, რომ ხელისუფლება წამოვიდეს დიალოგზე და გაიგოგნოს 900 ათასი ადამიანის ხმა. ხელისუფლებამ გადაწყვიტა, რომ თქვენი ხმა არაფერია, ივანიშვილი ამბობს, რომ თქვენ უნდა დაგსაქსოთ, უნდა დაგიჭიროთ", — ამბობს გიგი უგულავა.

პოლიციაა მობილიზებული გურჯაანის რაიონული სასამართლოს ეზოში, სადაც გაერთიანებული ოპოზიციის საპროტესტო აქცია დღეს, 20 დეკემბერს განახლდა. ადგილიდან On.ge-ს ჟურნალისტი იუწყება, რომ პატრულს ჩაკეტილი აქვს შესასვლელი და აცხადებენ, რომ აქციის მონაწილეებს პროცესის დაწყებისას შეუშვებენ. დავით კირკიტაძის აღკვეთის ღონისძიების პროცესზე 20 ადამიანს მისცემენ დასწრების უფლებას. აქციის მონაწილეები ამ ფაქტს აპროტესტებენ და აცხადებენ, რომ დარბაზი უფრო მეტ ადამიანს იტევს.

ფოტო: თამუნა გეგიძე / On.ge

ფოტო: თამუნა გეგიძე / On.ge

17 დეკემბერს პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის ერთიანი ნაციონალური მოძრაობის წევრი, დავით კირკიტაძე დააკავეს. ის ბრალს არ აღიარებს და პროტესტის ნიშნად შიმშილობს.

დავით კირკიტაძეს ბრალი 19 დეკემბერს წარუდგინეს თუმდა სასამართლო პროცესი მომდევნო დღისთვის გადაიდო. გაერთიანებული ოპოზიცია აცხადებს, რომ დავით კირკიტაძე პოლიტიკური პატიმარია.

შსს-მ პოლიციელზე თავდასხმის ბრალდებით, 18 დეკემბერს კიდევ ერთი პირი დააკავა. ასევე დააკავეს ორი პირი ოპოზიციაზე თავდასხმის ბრალდებით.