"თქვენმა ქვეყანამ შეასრულა საჭირო საშინაო დავალება, ყველა მოთხოვნა და დაიცვა პირობები. ახლა ჩვენი ჯერია ევროკავშირის მხრიდან შევასრულოთ დანაპირები და მივცეთ საქართველოს სავიზო ლიბერალიზაცია", - ეს განცხადება ევროპის სახალხო პარტიის ვიცე პრეზიდენტმა და გერმანიის ქრისტიან-დემოკრატიული პარტიის წარმომადგენელმა დევიდ მაკალისტერმა საქართველოში ვიზიტისას გააკეთა.

ევროპარლამენტარმა ბრიფინგზე გამოსვლისას 8 ოქტომბრის საპარლამენტო არჩევნებზეც გაამახვილა ყურადღება:

"მინდა მკაფიოდ განვაცხადო, როგორც გერმანიის ქრისტიან-დემოკრატიული კავშირის წარმომადგენელმა, მე მხარს ვუჭერ საქართველოსთვის ვიზალიბერალიზაციის პოლიტიკას. თქვენმა ქვეყანამ შეასრულა საჭირო საშინაო დავალება, ყველა მოთხოვნა და დაიცვა პირობები. ახლა ჩვენი ჯერია ევროკავშირის მხრიდან შევასრულოთ დანაპირები და მივცეთ საქართველოს სავიზო ლიბერალიზაცია. მე საპარლამენტო კომიტეტში საქართველოს სასარგებლოდ მივეცი ხმა. ახლა ჯერი პარლამენტზეა, გადაწყვეტილება ბრიუსელსა და სტრასბურგში უნდა მიიღონ. 2016 წელი მნიშვნელოვანია იმიტომაც, რომ 8 ოქტომბერს საქართველოში საპარლამენტო არჩევნები იმართება. ევროკავშირში მოლოდინი გვაქვს, რომ საქართველოში სამართლიანი არჩევნები ჩატარდეს".