რეჯეპ ტაიპ ერდოღანი აცხადებს, რომ ევროკავშირმა თურქეთს 3 მილიარდი ევრო უნდა გადაუხადოს, სანამ მიგრანტების კრიზისის გადასაჭრელად მას მიმართავს. ინფორმაციას Express ავრცელებს.

თურქეთში, გადატრიალების მცდელობის შემდეგ გატარებული სადამსჯელო ღონისძიებების შემდეგ, ბრიუსელს ანკარასთან შეთანხმების მიღწევა უჭირს, რომელიც თავის მხრივ მიგრანტებს საბერძნეთში გადასასვლელს უბლოკავს.

ერდოღანი აცხადებს, რომ თურქეთი ფრუსტრირებულია მიუღწეველი შეთანხმებებით. მან ოთხშაბათს განაცხადა, რომ ევროკავშირთან არსებულ ძველ შეთანხმებებს გააუქმებდა, თუ მათი მოთხოვნები ევროკავშირისგან უგულებელყოფილი დარჩებოდა.

"ევროკავშირი თურქეთთან მიმართებაში სამართლიან მეთოდებს არ იყენებს".

ერდოღანმა დასძინა, რომ თურქეთი ევროკავშირისგან სავიზო ლიბერალიზაციას ივნისში ელოდებოდა:

"თუ ჩვენი მოლოდინები არ იქნება დაკმაყოფილებული, შეუძლებელი იქნება შეთანხმება".

შეთანხმების მიხედვით, საბერძნეთის კუნძულებზე გადასული მიგრანტები უკან უნდა დაებრუნებინა თავისთან თურქეთს, თურქეთის მოქალაქეები კი შენგენის ზონაში უვიზოდ იმოგზაურებდნენ.

ევროკავშირი აცხადებს, რომ თურქეთი არ აკმაყოფილებს მათი ხელშეკრულების ყველა მუხლს.

ავსტრიელმა კანცლერმა კრისტენ კერნმა წინადადებაც კი შესთავაზა ევროკავშირს, შეწყდეს თურქეთის გაერთიანებაში შესვლაზე საუბარი, რადგან თურქეთში დემოკრატიის დეფიციტია:

"მთავარი საკითხი არის, დაიწყოს თუ არა ევროკავშირმა თურქეთთან მოლაპარაკებების ახალი ეტაპი. მე ამის წინააღმდეგი ვარ".