მმართველი გუნდის მიერ მხარდაჭერილი კანდიდატის სალომე ზურაბიშვილის შტაბში ჟურნალისტებს ეგზიტპოლების გაცნობის დროს ყოფნის უფლებას არ აძლევენ. ადგილზე მყოფი ჟურნალისტების ინფორმაციით, მათ არ მისცემენ საშუალებას პრეზიდენტობის კანდიდატის ემოციები გადაიღონ. გადაწყვეტილების მიზეზი ჟურნალისტებისთვის არ განუმარტია სალომე ზურაბიშვილის პრესსამსახურს.

შეგახსენებთ, რომ საარჩევნო უბნების დახურვისთანავე, ანუ 20:00-ზე ორი ეგზიტპოლი გამოქვეყნდება. სალომე ზურაბიშვილი თავის შტაბში იმედის ეგზიტპოლებს ელოდება. რუსთავი 2-ისთვის კი ეგზიტპოლი ედისონ რისერჩმა ჩაატარა.

ქართულ ოცნებაში მოლოდინია, რომ არჩევნებში ზურაბიშვილი გაიმარჯვებს. ქართული ოცნების დეპუტატმა, მამუკა მდინარაძემ განაცხადა, რომ ნაციონალურ მოძრაობას სავარაუდოდ 300 000 ხმით მოუგებენ. რაც შეეხება გაერთიანებულ ოპოზიციას, იქ აცხადებენ, რომ ხელისუფლებამ არჩევნების გასაყალბებლად ყველა მექანიზმი გამოიყენა.