საქართველოს მთავარი პროკურატურის ინფორმაციით, "მირზა სუბელიანის ჩანაწერებს" რამდენიმე მიმართულებით იძიებს. მათ შორისაა უკანონო ჩაწერა, შანტაჟი და სამსახურეობრივი უფლებამოსილების გადაჭარბება. უწყება მუშაობს იმ ვერსიაზე, რომ ჩანაწერი შესაძლოა, შემდგომი გავრცელების მიზნით დადგმული იყოს.

პროკურატურის სამუშაო ვერსიები

ფარული ჩაწერა

უწყების განცხადებით, მიმდინარეობს გამოძიება იმის დასადგენად, თუ როგორ ჩაწერეს ხორავას ქუჩის საქმეზე დანაშაულის შეუტყობინებლობისთვის მსჯავრდებული, მირზა სუბელიანის საუბარი. გამოძიება პატიმრობაში მყოფი პირის კერძო საუბრის უნებართვო ჩაწერის და ჩანაწერის უკანონოდ შენახვის მუხლითაა დაწყებული.

პირადი ცხოვრების ამსახველი კადრების მოპოვება და შანტაჟი

როგორც პროკურატურის წარმომადგენელმა საგანგებო ბრიფინგზე განაცხადა, აუდიოჩანაწერების შესახებ მათ პენიტენციური სამსახურის თანამშრომელმა აცნობა. უწყების ცნობით, აღნიშნულ პირს ჩანაწერების გავრცელება აიძულეს და პირადი ცხოვრების კადრების გასაჯაროებით ემუქრებოდნენ. აქედან გამომდინარე, მიმდინარეობს გამოძიება სისხლის სამართლის კოდექსით, პირადი ცხოვრების საიდუმლოს უკანონოდ მოპოვებისა და შენახვის საქმეზე.

სამსახურებრივი უფლებამოსილების შესაძლო გადამეტება

უწყების განცხადებით, ამ საქმეზე ჩანაწერის გავრცელების საკითხს სამსახურებრივი უფლებამოსილების შესაძლო გადამეტების მუხლით იძიებენ.

ჩანაწერის ავთენტურობის დადგენა

უწყებაში ამბობენ, რომ მედიაში გავრცელებული ჩანაწერის გარდა, მათ კიდევ რამდენიმე ფარული ჩანაწერი აქვთ. მათი თქმით, ჩანაწერები პენიტენციური სამსახურის თანამშრომელმა მეხსიერების ბარათით მიაწოდა.

საუბრების შესაძლო ორგანიზება

პროკურატურის განცხადებით, დაწყებული გამოძიების ფარგლებში ამოღებული აუდიოჩანაწერების პირველად ანალიზზე დაყრდნობით, გამოძიება ინტენსიურად განიხილავს პირთა ჯგუფის მიერ კონკრეტული შინაარსის საუბრების ორგანიზების ვერსიას მათი შემდგომი გავრცელების მიზნით.

შესაძლო დანაშაულში მონაწილე პირების იდენტიფიცირება

უწყებაში ამბობენ, რომ ტარდება ყველა აუცილებელი საგამოძიებო და საპროცესო მოქმედება, როგორც ამ დანაშაულთან შემხებლობაში მყოფი ყველა პირის გამოსავლენად, აგრეთვე, მედიასაშუალებით გავრცელებულ ფარულ აუდიოჩანაწერში გახმოვანებულ შესაძლო დანაშაულებრივ ფაქტებთან დაკავშირებით.

"მირზა სუბელიანის ჩანაწერები"

გუშინ, 14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

პროკურატურაში ამბობენ, რომ გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია.

ამავე თემაზე: