პარტია გირჩის ლიდერის, ზურაბ ჯაფარიძის თქმით, დაანონსებულ მარიხუანის ლეგალიზების აღსანიშნავ ფესტივალზე, ერთადერთი, ვინც კანონს დაარღვევს, თავად იქნება:

"თუ შსს-ს განცხადება სერიოზულია, გაქვთ შანსი, ცხოვრებაში პირველად, ლაივში ნახოთ როგორ აპატიმრებენ პრეზიდენტობის კანდიდატს. მე ამის არ მჯერა, მაგრამ მაინც კარგი შანსია, მოხვიდეთ, გაერთოთ, დაისვენოთ და, შესაძლოა, ნახოთ ისტორიული მომენტი".

გირჩის პრეზიდენტობის კანდიდატი მიმართავს ყველა იმ ადამიანს, ვინც ფიქრობდა მონაწილეობას, რომ ფესტივალი ჩატარდება ისე, როგორც არის დაგეგმილი:

"ყველა ადამიანს, ვისთვისაც ძვირფასია თავისუფლება, მოვუწოდებ, მოვიდნენ, მიიღონ მონაწილეობა, გაერთონ. არცერთ იქ მოსულ ადამიანს არავინ თხოვს, არც მე და არც გირჩი, რომ მათ რაიმე კანონდარღვევა ჩაიდინონ. კანონს დავარღვევ მხოლოდ მე, ამ ქვეყნის მოქალაქე, პრეზიდენტობის კანდიდატი ზურაბ ჯაფარიძე. ეს მინდა გასაგები იყოს ყველასთვის".

ჯაფარიძე ამბობს, რომ მას საკონსტიტუციო სასამართლომ მისცა მარიხუანის მოხმარების უფლება და მისივე თქმით, ეს გულისხმობს იმასაც, რომ უნდა არსებობდეს ლეგალური მოპოვების გზები — კულტივაცია ან ყიდვა:

"ფორმა მოფიქრებული არ მაქვს, მაგრამ რაღაცას გავაკეთებ ისეთს, რაც ლეგალურს გახდის კოფი შოპებს", — ამბობს ზურაბ ჯაფარიძე.

შინაგან საქმეთა სამინისტრო, პარტია გირჩის მიერ დაანონსებულ მარიხუანის ლეგალიზების ფესტივალს დღეს, 13 ოქტომბერს გამოეხმაურა. შსს აცხადებს, რომ გირჩის მიერ დაანონსებულ ფესტივალს ისინი აფასებენ, როგორც დანაშაულის განზრახვის ორგანიზებას, სამართალდარღვევების ჩადენისაკენ მოწოდებასა და მოქალაქეთა წახალისებას, ჩაებან კანონსაწინააღმდეგო ქმედებებში.

პოლიტიკური გაერთიანება გირჩი 20 ოქტომბერს მარიხუანის ლეგალიზების აღსანიშნავი ფესტივალის გამართვას გეგმას. იაგო ხვიჩიას თქმით, ფესტივალის ზუსტ ფორმატზე ჯერ შეთანხმებულები არ არიან, თუმცა მისივე განმარტებით, დედა-ენის ბაღში მოსული ხალხი, მათ შორის ტურისტებიც მარიხუანის ყიდვასა და მოხმარებას თავისუფლად შეძლებენ.