ცენტრალურმა საარჩევნო კომისიამ მიიჩნია, რომ თბილისის მერიის ფეისბუქის გვერდზე სოხუმის დაცემის დღეს ხელისუფლების მიერ მხარდაჭერილი კანდიდატის, სალომე ზურაბიშვილის ფოტოს გამოქვეყნებით კანონი არ დარღვეულა.

სამართლებრივი რეაგირებისთვის ცესკოს სამართლიანმა არჩევნებმა მიმართა. საარჩევნო კოდექსის 48-ე მუხლის თანახმად, იკრძალება ბიუჯეტიდან დაფინანსებული სახელმწიფო ხელისუფლების დაწესებულებებისთვის განკუთვნილი საკომუნიკაციო საშუალებების, საინფორმაციო მომსახურებისა და სხვადასხვა სახის ტექნიკის გამოყენება.

ცესკომ დაადგინა, რომ მოცემულ შემთხვევაში სოციალურ ქსელში და ვებგვერდზე სააგიტაციო შინაარსის მასალა არ განთავსებულა. მათივე ცნობით, განცხადებაში მითითებული ინფორმაცია თბილისის მერის, როგორც საჯარო პირის საქმიანობის გაშუქების და არა სააგიტაციო მიზნებიდან გამომდინარე გავრცელდა.

27 სექტემბერს თბილისის მერმა კახა კალაძემ გმირთა მოედანზე გვირგვინით შეამკო ტერიტორიული მთლიანობისთვის დაღუპულ გმირთა მემორიალი. თბილისის მერიის ოფიციალურ ფეისბუქგვერდზე გავრცელდა ფოტო, სადაც ჩანს, რომ კახა კალაძესთან ერთად მემორიალთან მივიდნენ პარლამენტის თავმჯდომარე ირაკლი კობახიძე და მათივე მხარდაჭერილი პრეზიდენტობის კანდიდატი სალომე ზურაბიშვილი.