ბათუმში კომახიძის ქუჩაზე მდებარე ზაზა ღოღობერიძის სტომატოლოგიურ კლინიკას მოქალაქეები თაღლითობაში ადანაშაულებენ. დღეს, 11 ოქტომბერს რამდენიმე ათეულმა დაზარალებულმა ბათუმის იუსტიციის სახლთან გამართა აქცია.

მათი თქმით, სტომატოლოგმა მოტყუებით უფასო მომსახურება შესთავაზა, უმეტესობას მკურნალობა ჩაუტარა, ზოგს კბილები ამოუღო და მომსახურება შეწყვიტა.

პაციენტის, გურამ მიქელაძის ცნობით, ექიმი მათ დაზღვევის ფარგლებში მკურნალობას დაჰპირდა. ის ამბობს, რომ სადაზღვევო ხელშეკრულების ნაცვლად, მოტყუებით ბანკთან გააფორმეს ხელშეკრულება და ექიმმა თანხა მიითვისა.

"ხელი მოვაწერეთ, მაგრამ არ ვიცოდით, რომ სესხი კეთდებოდა, უნდა გაკეთებულიყო დაზღვევით და უნდა გადაეხადა მას. სახანძროს თანამშრომლებია აქ და ყველას აქვს დაზღვევა", — ჰყვება აქციის მონაწილე უჩა ართმელიძე.

კიდევ ერთი დაზარალებული, გურამ მიქელაძე აცხადებს, რომ ექიმი მათ დაზღვევის გაფორმებაში დახმარებას დაჰპირდა:

"დაგვარწმუნა იმაში, რომ უფასოდ კეთდებოდა კბილები, რომ მას ჰყავდა და ლეილა ღოღობერიძე ჯანდაცვის სამინისტროში. თქვა, რომ ეხმარებოდა საყოველთაო დაზღვევის გადმორიცხვაზე. ჩვენც დავთანხმდით, რომ უპრობლემოდ იქნებოდა ეს ყველაფერი. მან ადგილზევე გააფორმა ეს დოკუმენტები, მე პირადად 20 კბილი მაქვს ჯანმრთელი და მან ჩამიწერა 28 კბილი და 2 800 ლარი გამომატანინა შეცდომით".

აქციის კიდევ ერთი მონაწილე ამბობს, რომ ექიმს ვერ უკავშირდება და მასთან სამსახურში მისვლისას ადგილზე არ ხვდება:

"მითხრა, გაგიკეთებ კბილებსო. მივედი, მითხრა, მოდი ხვალ, მოდი ზეგ. ასე მატყუებს, მტკივა კბილები და ვერ ვლაპარაკობ".

დაზარალებული დავით ართმელიძე ჰყვება, რომ ექიმმა ფული ვინმე გულო ფუტკარაძის ანგარიშზე გადაარიცხინა:

"დავრჩით ასე უკბილოდ. ფულს ზოგს ვიხდით, ზოგს ვერ ვიხდით და ვართ ასე".

შინაგან საქმეთა სამინისტროში On.ge-ს უთხრეს, რომ საქმეზე გამოძიება სისხლის სამართლის კოდექსის 180-ე, თაღლითობის მუხლით აღიძრა.