არასამთავრობო ორგანიზაცია სამართლიანი არჩევნები მმართველი პარტიის მხარდაჭერილი კანდიდატის, სალომე ზურაბიშვილის სასარგებლოდ ადმინისტრაციული რესურსის გამოყენებაზე საუბრობს.

ორგანიზაციის განცხადებით, ერთ-ერთი ასეთი შემთხვევა იყო 27 სექტემბერს სალომე ზურაბიშვილის გმირთა მოედანზე თბილისის მერ კახა კალაძესთან და პარლამენტის თავმჯდომარე, ირაკლი კობახიძესთან ერთად მისვლა, რის შემდეგაც ფოტომასალა მერიის ვებ და ფეისბუქგვერდზე გამოქვეყნდა. სამართლიანი არჩევნები აცხადებს, რომ თბილისის მერიის მიერ პრეზიდენტობის კანდიდატის აქტივობის ამსახველი მასალის გავრცელებით დაირღვა საარჩევნო კოდექსის 48-ე მუხლი.

მუხლის თანახმად, დაუშვებელია წინასაარჩევნო კამპანიის პროცესში რომელიმე პოლიტიკური პარტიის ან კანდიდატის სასარგებლოდ ადმინისტრაციული რესურსების გამოყენება. მათ შორის იკრძალება ადგილობრივი თვითმმართველობის ორგანოებისა და იმ ორგანიზაციებისათვის, რომლებიც საქართველოს სახელმწიფო ბიუჯეტიდან ფინანსდებიან, განკუთვნილი საკომუნიკაციო საშუალებების, საინფორმაციო მომსახურებისა და სხვადასხვა სახის ტექნიკის გამოყენება.

მეორე შემთხვევად ორგანიზაცია ტყიბულის საინფორმაციო ცენტრის Info ტყიბულის გვერდზე გამოქვეყნებულ მასალას ასახელებს. 19 სექტემბერს, გვერდზე სალომე ზურაბიშვილის წინასაარჩევნო შეხვედრის შესახებ დაწერეს.

სამართლიანი არჩევნები ამ შემთხვევაშიც საარჩევნო კოდექსის 48-ე მუხლის დარღვევაზე საუბრობს, რადგან საინფორმაციო ცენტრი Info ტყიბული წარმოადგენს ადგილობრივი ბიუჯეტიდან დაფინანსებულ დაწესებულებას.

მას შემდეგ, რაც ქართულმა ოცნებამ განაცხადა, რომ დამოუკიდებელ კანდიდატს უჭერს მხარს პარტიის თავმჯდომარემ, ბიძინა ივანიშვილმა თქვა, რომ მხარდაჭერა გამოიხატებოდა როგორც ფინანსურად, ასევე სხვა სახის რესურსებით.

ივანიშვილმა მოუწოდა პარტიის წევრებს ყველაფერი გაეკეთებინათ იმისთვის, რომ ზურაბიშვილს არჩევნებში გაემარჯვა. ზურაბიშვილის შემომწირველებს შორის არიან ქართული ოცნების დეპუტატები და პარტიის გენერალური მდივანი, კახა კალაძე.