დღეს, 6 ოქტომბერს დიპლომატიურ კორპუსთან შეხვედრის შემდეგ მმართველი პარტიის საპრეზიდენტო კანდიდატმა, სალომე ზურაბიშვილმა არასამთავრობო ორგანიზაციების შესახებ ისაუბრა. On.ge-მ ზურაბიშვილის პრესსამსახურიდან მეილით მიიღო შეტყობინება, რომელშიც კანდიდატის კომენტარია გამოგზავნილი.

შეტყობინებაში არის სალომე ზურაბიშვილის შემდეგი ციტატა:

"დიდ პატივს ვცემ არასამთავრობო სექტორს და სამომავლოდაც, როგორც პრეზიდენტი, ხშირი ურთიერთობა მექნება არასამთავრობო ორგანიზაციებთან".

ციტატაზე დაყრდნობით On.ge-მ მასალა მოამზადა, სადაც აღნიშნულია რომ ზურაბიშვილის თქმით, დიდ პატივს სცემს არასამთავრობო ორგანიზაციებს. მოგვიანებით, მედიებმა გაავრცელეს ზურაბიშვილის ინტერვიუს ვიდეომასალა, სადაც ჩანს, რომ კანდიდატმა სხვა წინადადება თქვა:

"მე მზად ვარ, რომ შევხვდე არასამთავრობო ორგანიზაციებს. იმიტომ, რომ მე არათუ დიდ პატივს ვცემ, საერთოდ არა, არასამთავრობო სექტორს, მაგრამ როგორც პრეზიდენტი დამჭირდება მათთან ურთიერთობა", — ზურაბიშვილის აღნიშნული ციტატა ამბის შინაარსს მთლიანად ცვლის.

On.ge დაუკავშირდა ზურაბიშვილის პრესსამსახურს და ჰკითხა რატომ გაავრცელეს მათ განსხვავებული ციტატა, რაზეც გვიპასუხეს, რომ ციტატის შინაარსი შეცვლილი არ არის.

"მაგას გულისხმობდა, "არათუ დიდ პატივს ვცემ" როცა თქვა, მარტო პატივს კი არ ვცემო და პატივისცემის გამო კი არაო, არამედ როგორც პრეზიდენტიც შევხვდებიო, ეს იყო მთავარი აზრი", — განაცხადეს პრესსამსახურში.

პრესსამსახურში ხაზგასმით აღნიშნეს, რომ ზურაბიშვილი არ გულისხმობდა იმას, რომ პატივს არ სცემს არასამთავრობო სექტორს.