მმართველი პარტია ქართული ოცნება მათ მიერ მხარდაჭერილი კანდიდატის, სალომე ზურაბიშვილის კრიტიკის საპასუხოდ ნაციონალური მოძრაობის საპრეზიდენტო კანდიდატს, გრიგოლ ვაშაძეს პრორუსულობაში ადანაშაულებს. მსგავს შეფასებებს სალომე ზურაბიშვილი მას შემდეგ იღებდა, რაც განაცხადა რომ 2008 წლის აგვისტოს ომში საომარი ვითარებები საქართველომ დაიწყო.

ქართული ოცნების გენერალურმა მდივნმა, კახა კალაძემ პარტიის საგანგებო შეხვედრის შემდეგ განაცხადა, რომ ნაციონალურ მოძრაობას არ აქვს უფლება სალომე ზურაბიშვილს მოღალატე უწოდოს, რადგან თავად წარადგინეს "რუსეთთან ორგანულად შესისხლორცებული კანდიდატი".

"ხოლო ბოლშევიკური ოკუპაციის გამო ემიგრაციაში დაბადებულ ნიკო ნიკოლაძის შთამომავალს და რუსული ბაზების საქართველოდან გამყვანს, სალომე ზურაბიშვილს — მოღალატეობა დასწამეს", — განაცხადა კალაძემ.

კალაძემ ასევე აღნიშნა, რომ ნაციონალურმა მოძრაობამ თავად "ჩააბარა" რუსეთს საქართველოს ორი ისტორიული რეგიონი. მისივე თქმით, მაშინდელმა მმართველმა პარტიამ წაგებული ომი "გამარჯვებად მონათლა" და ხალხი რუსთაველზე აზეიმა.