საქართველოს რეგიონული მართვის ხელმძღვანელი, სოზარ სუბარი ქართული ოცნების მიერ მხარდაჭერილ პრეზიდენტობის კანდიდატს აფასებს. კომენტარს უცვლელად გთავაზობთ.

"ქალბატონი სალომე არ არის ქართული ოცნების წევრი. ის არის დამოუკიდებელი კანდიდატი, რომელსაც ქართული ოცნება უჭერს მხარს. ქალბატონი სალომე პარტიის წევრიც რომ იყოს, მაშინაც დამოუკიდებელი იქნებოდა, რადგან დამოუკიდებელი პიროვნებაა და თავის სათქმელს ყოველთვის პირდაპირ ამბობს, ყოველთვის ამბობს იმას, რასაც ფიქრობს. მაგრამ ზოგიერთი ჩვენი ოპონენტისგან განსხვავებით, ის არასდროს იქნება საქართველოს ოპონენტი, ის ყოველთვის არის საქართველოს მხარეს.

ზოგიერთ შემთხვევებში შეიძლება იყოს ხელისუფლების ოპონენტი, თუ ხელისუფლება და ხელისუფლების პოლიტიკა სცდება მის ხედვას, მაგრამ ის არასდროს იქნება საქართველოს ოპონენტი. ყოველთვის, როცა ხელისუფლება გადადგამს ქვეყნისთვის საჭირო ნაბიჯს, ის ყოველთვის იდგება ამ პოლიტიკის გვერდით, ყოველთვის იდგება საქართველოს გვერდით და იქნება ხელისუფლების მხარდამჭერი ქვეყნისთვის მნიშვნელოვან ყველა საქმეში. მნიშვნელოვანია, რომ ის, ერთი მხრივ, არის დამოუკიდებელი, მაგრამ მეორე მხრივ, არასდროს იქნება საკუთარი ქვეყნის ოპონენტი. ის იქნება ყოველთვის თავისი ქვეყნის გამარჯვებისთვის მებრძოლი.

ამ ბოლო პერიოდში საკმაოდ აქტუალურია და ხშირად ვისმენთ სლოგანს - მეტი ევროპა საქართველოში და მეტი საქართველო ევროპაში. დღეს ჩვენ გვაქვს შანსი, რომ ეს ფიგურალური გამოთქმა ვაქციოთ რეალობად. ქალბატონი სალომეს პრეზიდენტობა ნიშნავს მეტ ევროპას საქართველოში და უფრო სწრაფ სვლას ჩვენი მიზნისკენ. ეს არის, საერთო, ევროპული ოჯახის ღირსეული და სრულუფლებიანი წევრობა, ეს არის ნატო-ს წევრობა და ამაში ძალიან დიდი წვლილის შეტანა შეუძლია ქალბატონ სალომეს, რომელმაც უზარმაზარი წვლილი შეიტანა საქართველოდან რუსეთის სამხედრო ბაზების გაყვანაში და რომელიც შეძლებს დააჩქაროს ჩვენი ინტეგრაცია ევროპასა და ნატო-ში", — აღნიშნა სოზარ სუბარმა.