სახელმწიფო უსაფრთხოების სამსახურში On.ge-ს განუცხადეს, რომ დე ფაქტო ხელისუფლების მიერ ე.წ. საზღვრის უკანონო კვეთის ბრალდებით დაკავებული ხუთი მოლაშქრეს გათავისუფლება ხვალ, 30 აგვისტოს იგეგმება.

სუს-ის ცნობით, დაკავებულების ჯანმრთელობასა და სიცოცხლეს საფრთხე არ ემუქრება.

"ევროკავშირის სადამკვირვებლო მისიის ცხელი ხაზით მიღებული ინფორმაციით, საოკუპაციო რეჟიმის მიერ ე.წ. საზღვრის უკანონო კვეთის ბრალდებით დაკავებული 5 პირის ე.წ. სასამართლო პროცესი დღის მეორე ნახევარში ცხინვალში გაიმართა. აღნიშნული წარმოადგენს თავისუფალი გადაადგილების უკანონო შეზღუდვას, რაც საფრთხეს უქმნის ადგილზე არსებული უსაფრთხოების გარემოს", - ნათქვამია სუს-ის განცხადებაში.

თრუსოს ხეობაში ხუთი მოლაშქრე რუსმა სამხედროებმა გუშინ, 28 აგვისტოს, საღამოს დააკავეს. სახელმწიფო უსაფრთხოების სამსახურში On.ge-ს განუცხადეს, რომ ამოქმედებულია ცხელი ხაზი და ინფორმირებულია ევროკავშირის სადამკვირვებლო მისია.