აშშ-ის პრეზიდენტმა დონალდ ტრამპმა სოციალურ ქსელში უცენზურო ლექსიკით გაჯერებული პოსტი გამოაქვეყნა, რომელშიც ის ირანს ელექტროსადგურებისა და ხიდების განადგურებით დაემუქრა. ამის შესახებ ინფორმაციას BBC ავრცელებს.

მან გაიმეორა ადრინდელი მუქარა "ჯოჯოხეთის" მოწყობის შესახებ, თუმცა ამერიკულ მედიასთან საუბრისას აღნიშნა, რომ თეირანთან შეთანხმების მიღწევის "კარგი შანსი" არსებობს.

ირანმა ტრამპის "უმწეო, ნერვული და სულელური" უწოდა. ტრამპის ახალი მუქარა ირანში ჩამოგდებული ამერიკული გამანადგურებლის ეკიპაჟის მეორე წევრს გადარჩენის ინფორმაციას მოჰყვა.

BBC წერს, რომ აშშ და ირანი ორივე ამერიკელი სამხედრო მოსამსახურის პოვნას ცდილობდა. F-15-ის პილოტი პარასკევს, თვითმფრინავის ჩამოგდებიდან მალევე იპოვეს.

ირანმა ასევე მნიშვნელოვნად შეაფერხა ტრანზიტი ჰორმუზის სრუტეში — სასიცოცხლო მნიშვნელობის საზღვაო გზაზე, რომელზეც ჩვეულებრივ მსოფლიო ნავთობისა და გაზის დაახლოებით მეხუთედი მოდის.

შეფერხებების გამო, ტრამპმა მარტში ირანს სრუტის გახსნისთვის ბოლო ვადა რამდენჯერმე დააწესა. კვირას, 5 აპრილს მან თავის პლატფორმა Truth Social-ზე ეს მოთხოვნა კიდევ ერთხელ დაადასტურა.

"სამშაბათი ირანში ელექტროსადგურებისა და ხიდების დღე იქნება, ყველაფერი ერთად. მსგავსი არაფერი გინახავთ!!! გახსენით ეს დედა******ლი სრუტე, შეშლილო ნაბიჭვრებო, თორემ ჯოჯოხეთში იცხოვრებთ — უბრალოდ უყურეთ! დიდება ალაჰს", — დაწერა ტრამპმა.

მოგვიანებით მან Fox News-ს განუცხადა, რომ შეთანხმების მიღწევის "კარგი შანსი" არსებობდა, თუმცა განიხილავდა "ყველაფრის აფეთქებას და ნავთობის ხელში ჩაგდებას", თუ ომის დასასრულებლად შეთანხმება სწრაფად არ შედგებოდა.

ტრამპმა ჰორმუზის სრუტის გახსნის ვადები რამდენჯერმე გაახანგრძლივა. 21 მარტს ტრამპი ირანს ელექტროსადგურების განადგურებით პირველად დაემუქრა, თუ სრუტე 48 საათში "სრულად არ გაიხსნებოდა". ორი დღის შემდეგ მან თქვა, რომ დარტყმებს კიდევ ხუთი დღით — 28 მარტამდე გადადებდა, სანამ ირანთან "კარგი" და "პროდუქტიული" მოლაპარაკებები გრძელდებოდა. ირანმა ოფიციალურ პირებსა და ტრამპის ადმინისტრაციას შორის რაიმე სახის კონტაქტი უარყო. აღნიშნული თარიღის მოახლოებისას ტრამპმა ბოლო ვადა კიდევ 10 დღით, 6 აპრილამდე გადასწია.

BBC-ის ცნობით, ირანის პრეზიდენტის ადმინისტრაციის წარმომადგენელმა, მაჰდი ტაბატაბაიმ განაცხადა, რომ ჰორმუზის სრუტე მაშინ "გაიხსნება" , როდესაც "ტრანზიტის საფასურის ნაწილს ომის შედეგად მიყენებული ზარალის ასანაზღაურებლად გამოიყენებენ". ირანმა მიანიშნა, რომ სრუტეში გამავალი გემებისთვის გადასახადის დაწესებას გეგმავს.

ირანის ცენტრალური სამხედრო სარდლობის გენერალმა ალი აბდოლაჰი ალიაბადიმ ტრამპის მუქარას "უმწეო, ნერვული, გაუწონასწორებელი და სულელური ქმედება" უწოდა და დასძინა, რომ აშშ-ის ლიდერისთვის "ჯოჯოხეთის კარიბჭე გაიღება".

ცნობისთვის, დღეს, 6 აპრილს, თბილისის დროით საღამოს 9 საათზე, დონალდ ტრამპი ოვალურ კაბინეტში მედიისთვის სამხედროებთან ერთად განცხადებას გააკეთებს.

შეგახსენებთ, 8 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა.

თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.
მედიაში გავრცელებული ცნობებით, ირანის ახალ სულიერ ლიდერად ალი ხამენეის ვაჟი მოჯტაბა აირჩიეს. "ადამიანის უფლებათა დამცველების საინფორმაციო სააგენტოს" (HRANA) მონაცემებით, 2026 წლის დასაწყისისთვის ირანში მიმდინარე საპროტესტო აქციების დროს დაღუპულთა რაოდენობა მკვეთრად გაიზარდა და მსხვერპლთა რიცხვმა 6 000-ს გადააჭარბა.