ქალს, რომელიც ცნობილია როგორც "კეტამინის დედოფალი" და რომელმაც მსახიობ მეთიუ პერის სასიკვდილო დოზა მიჰყიდა, ოთხშაბათს ფედერალურ ციხეში 15 წლით თავისუფლების აღკვეთა მიესაჯა.

ჯასვინ სანგამ, რომელიც პროკურატურის თქმით, ჰოლივუდში მდებარე საკუთარი სახლიდან ნარკოტიკების რეალიზაციის ფართომასშტაბიან ბიზნესს მართავდა, სექტემბერში აღიარა დანაშაული რამდენიმე მუხლით, მათ შორის კეტამინის გავრცელებასა და ნარკოპრიტონის შენახვაში.

ჯასვინ სანგა

ფოტო: ჯოჯო კორში / BFA.com / Shutterstock

42 წლის სანგა იმ ხუთ პირს შორის ერთ-ერთია, რომლებსაც ბრალი მეთიუ პერისთვის კეტამინის მიწოდების შეთქმულებაში ედებოდათ. მსახიობი 2023 წლის ოქტომბერში, პრეპარატის მწვავე ზემოქმედების შედეგად გარდაიცვალა.

სასჯელის გამოცხადებისას, მოსამართლე შერილინ პის გარნეტმა აღნიშნა, რომ პერის სიკვდილთან დაკავშირებულ ბრალდებულებს შორის სანგა "ალბათ ერთ-ერთი ყველაზე დამნაშავეა".

"ეს განაჩენი არ ასახავს თქვენს ცუდ ადამიანობას", — განაცხადა მოსამართლემ — "ეს განაჩენი თქვენი უკანონო ქმედებების შედეგია". განაჩენის გამოცხადებისას სანგამ სახეზე ხელი აიფარა. მას 15-წლიან პატიმრობასთან ერთად, გათავისუფლების შემდეგ 3-წლიანი მკაცრი ზედამხედველობაც დაეკისრა.

ხელისუფლების განცხადებით, სანგამ პერის დაახლოებით 50 ფლაკონი კეტამინი მიჰყიდა 11,000 დოლარად, მათ შორის ის პარტიაც, რომელმაც 54 წლის მსახიობის სიკვდილი გამოიწვია.

ფოტო: Getty Images

სანგამ ასევე აღიარა, რომ 2019 წელს კეტამინი მიჰყიდა 33 წლის კოდი მაკლორის, რომელიც რამდენიმე საათში ზედოზირებით გარდაიცვალა. მაკლორის დამ სასამართლოში აღნიშნა: "შენ არ გიგრძვნია თავი საკმარისად ცუდად იმისთვის, რომ ჩემი ძმის სიკვდილის შემდეგ გაჩერებულიყავი. მხოლოდ დაკავებამ შეგაჩერა".

პერის მამინაცვალმა, კით მორისონმა, სასამართლოში სანგას მიმართა და უთხრა, რომ არ სძულს, თუმცა ხაზი გაუსვა, რომ მან "ნარკოდამოკიდებულს ნივთიერება მიაწოდა" და მეთიუსთან ერთად ყველა მისი სამომავლო შესაძლებლობა მოკვდა.

მეთიუ პერის მამინაცვალი, კით მორისონი, პასუხობს პრესის შეკითხვებს "კეტამინის დედოფლის", ჯასვინ სანგასთვის განაჩენის გამოტანის შემდეგ, ლოს-ანჯელესის შეერთებული შტატების სასამართლოს შენობასთან, ოთხშაბათს.

ფოტო: მიუნ ჯ. ჩანი / Los Angeles Times

"არ გადის დღე, რომ ჩემს ქმედებებზე არ ვიფიქრო. ძალიან მრცხვენია. გულწრფელად ვწუხვარ... ყოველდღე ვლოცულობ პატიებისთვის", — თქვა ბრალდებულმა სასამართლოზე. მან ამ გამოცდილებას თავისი ცხოვრების "ყველაზე სასტიკი გამოფხიზლება" უწოდა.

თუმცა, პროკურორებმა ეჭვქვეშ დააყენეს მისი სინანულის გულწრფელობა და აღნიშნეს, რომ სანგა ციხიდან განხორციელებულ სატელეფონო ზარებში ამ საქმეზე წიგნის დაწერასა და ამით ფულის შოვნას განიხილავდა, რაც იმაზე მიუთითებს, რომ ის საკუთარ დანაშაულს არა ტრაგედიად, არამედ "მომავალი შემოსავლის წყაროდ" აღიქვამდა.

მეთიუ პერის სიკვდილის საქმეში ფიგურირებენ სხვებიც:

სალვადორ პლასენსია (ყოფილი ექიმი): მიესაჯა 30 თვით (2.5 წელი) პატიმრობა;
მარკ ჩავესი (ყოფილი ექიმი): მიესაჯა 8 თვით შინაპატიმრობა;
კენეთ ივამასა (პერის ასისტენტი): განაჩენი ჯერ არ გამოცხადებულა.

ასევე ნახეთ: