ნევერმორის აკადემია ახალ სტუმრებს ელოდება. Netflix-ის პოპულარული სერიალის, Wednesday-ს მესამე სეზონში, რომლის გადაღებებიც ამჟამად დუბლინის მახლობლად მიმდინარეობს, სამი ცნობილი მსახიობი გამოჩნდება: ლინა ჰიდი (სატახტოთა თამაში), ენდრიუ მაკკარტი (წმინდა ელმოს ცეცხლი) და ჯეიმს ლანსი (ტედ ლასო).

ლინა ჰიდი, ენდრიუ მაკკარტი და ჯეიმს ლანსი

ფოტო: Getty Images

ეს სამეული უერთდება სერიალის ისედაც შთამბეჭდავ ახალ გუნდს, რომელშიც უკვე არიან უინონა რაიდერი, კრის სარანდონი, ნოა ტეილორი, ოსკარ მორგანი და კენედი მოიერი.

მიუხედავად იმისა, რომ მათი კონკრეტული როლების შესახებ ინფორმაცია ჯერჯერობით გასაიდუმლოებულია, შოურანერებმა, ალ გოფმა და მაილს მილარმა აღნიშნეს:

"ამ სეზონში ახალ სტუდენტებსა და მასწავლებლებს შევხვდებით და ადამსების ოჯახის ძველ, ჩახლართულ საიდუმლოებებსაც ფარდას ავხდით. არ თქვათ, რომ არ გაგაფრთხილეთ".

სავარაუდოდ, ბევრი ეს საიდუმლო ოფელია ფრამპის გარშემო იქნება კონცენტრირებული. ის მორტიშა ადამსის დაკარგული და, და უენსდეს დეიდაა, რომლის როლსაც ევა გრინი შეასრულებს. გრინი და სხვა ახალი წევრები კიდევ ერთხელ ითანამშრომლებენ აღმასრულებელ პროდიუსერსა და რეჟისორთან, ტიმ ბარტონთან.

"ძალიან მიხარია მესამე სეზონისთვის დაბრუნება და ორიგინალურ ქასთთან გაერთიანება. ჩემი ძველი მეგობრებისა და კოლეგების, უინონას, ევას, კრისისა და ნოას დამატება ამ სეზონს განსაკუთრებულს ხდის", — აღნიშნა ბარტონმა.

სერიალის მესამე სეზონი კვლავაც მისტიკით, იუმორითა და იმავე პირქუში ატმოსფეროთი იქნება გაჯერებული, ჯენა ორტეგა კვლავ უენსდეი ადამსის როლში ბრუნდება. მაყურებელს ახსოვს, რომ ბოლო სერიაში ის ბიძია ფესტერთან ერთად გაემგზავრა, რათა თავისი მეგობარი და მეზობელი, ენიდი ალფა-მაქციად ქცევისგან გადაერჩინა.

უენსდეის მესამე სეზონი, სავარაუდოდ 2027 წელს გამოვა.