თბილისში ბაგა-ბაღის ძიძამ რვა თვის ბავშვზე ფიზიკურად იძალადა. შემთხვევის ამსახველი ვიდეო მასალა მშობლებმა ფეისბუქში გაავრცელეს.

ბაგა-ბაღ პირველი ნაბიჯის დირექტორი, დიანა კიკნაძე რუსთავი 2-თან ინტერვიუში აცხადებს, რომ ძიძა ბაღიდან გათავისუფლებულია. მისივე თქმით, მშობლებს ჩანაწერები მიაწოდეს, თუმცა ძიძაზე ჩივილის ნაცვლად, ბავშვის ნათესავებმა ბაღისგან მოითხოვეს ფულადი კომპენსაცია:

"მე ეს არ ჩამითვლია იმიტომ, რომ ბავშვი არ დაზიანებულა, ისეთი შემთხვევა არ ყოფილა, რომ ბავშვს დაზიანება ქონოდა და რაღაც ფინანსურად გადამეხადა."

მისივე თქმით, ამის შემდეგ დაზარალებული ბავშვის მშობლებთან კონტაქტი არ ჰქონიათ და ფეისბუქში გავრცელებული ვიდეოთი შეიტყვეს. დირექტორი ამბობს, რომ არ ესმის რატომ გამოაქვეყნეს მშობლებმა ვიდეო.

როგორც On.ge-ს შინაგან საქმეთა სამინისტროში განუცხადეს, მათთვის მშობლებს არ მიუმართავთ, თუმცა ძალადობის ამსახველი ვიდეოს გავრცელების შემდეგ გამოძიება დაიწყო. მომხდარზე გამოძიება საქართველოს სისხლის სამართლის კოდექსის 126 მუხლის პირველი პრიმა ნაწილით დაიწყო, რაც არასრულწლოვანის მიმართ ძალადობას გულისხმობს.