ქართული ოცნებიდან გარიცხვის შემდეგ გირჩი დავით ჭიჭინაძეს თანამშრომლობას სთავაზობს. გირჩის განმარტებით, ისინი იზიარებენ დეპუტატის მიერ საჯაროდ გაჟღერებულ კრიტიკას პარლამენტის სპიკერის, ირაკლი კობახიძის მიმართ.

"თუ მზად ხართ გაიზიაროთ გირჩის ხედვები და შემდეგი 2 წელი იმუშაოთ პარლამენტში გირჩის ფრაქციის შექმნაზე, გთავაზობთ გირჩში გაწევრიანებას და გელით ი. გამრეკელის 47 ნომერში", - ნათქვამია განცხადებაში.

დავით ჭიჭინაძის გარიცხვის შესახებ ინფორმაცია დღეს, 18 ივლისს გახდა ცნობილი. პარტიის ოფიციალურ განცხადებაში ნათქვამია, რომ დავით ჭიჭინაძის პარტიიდან გარიცხვის მიზეზი გახდა მისი არაერთი საჯარო განცხადება, რომლითაც მან შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს.

დღეს, 18 ივლისს ქართული ოცნების უკვე ყოფილმა დეპუტატმა, დავით ჭიჭინაძემ განაცხადა, რომ ირაკლი კობახიძის მეთაურობით პარლამენტის ავტორიტეტი ძალიან დაბალია.

დეპუტატმა პარლამენტის თავმჯდომარე კიდევ ერთხელ მას შემდეგ გააკრიტიკა, რაც ჭიჭინაძემ აღნიშნა, რომ კობახიძე და მაშინდელი პრემიერი, გიორგი კვირიკაშვილი "ადამიანების სიცოცხლის ხარჯზე კომპრომისზე წავიდნენ".

"თმენის ვალდებულება მართლა დეპუტატებს გვაქვს, რომ ასეთ თავმჯდომარეს ვითმენთ", - თქვა ჭიჭინაძემ.