ბათუმში რუსეთი-ხორვატიის მატჩის მიმდინარეობისას ინციდენტი მოხდა. ამის შესახებ ინფორმაცია სოციალურ ქსელში თავად ინციდენტის მონაწილემ, ტოლერანტობისა და მრავალფეროვნების ინსტიტუტის დირექტორმა ეკა ჭითანავამ გაავრცელა.

მისი თქმით, ხორვატია-რუსეთის მატჩის დროს რუსეთის ერთ-ერთი მოქალაქე რუსულ დროშას აფრიალებდა, რამაც ეკა ჭითანავას გაღიზიანება გამოიწვია. ჭითანავას ცნობით, მასსა და რუსეთის მოქალაქე ტურისტს შორის სიტყვიერი შელაპარაკება მოხდა. მისი თქმით, მან საქართველოს ტერიორიაზე ოკუპანტი ქვეყნის დროშის ფრიალი გააპროტესტა.

"გუშინ რუსეთი-ხორვატიას მატჩს ვუყურებდი ბათუმში, ანბანის კოშკთან ახლოს, დიდ ეკრანზე. ცხადია იქ იმიტომ მივედი, რომ ხორვატიისთვის მეგულშემატკივრა და ემოციები ღიად გამომეხატა. რუსეთის ერთ-ერთი მოქალაქე ზუსტად ჩემს წინ აფრიალებდა რუსულ დროშას, რაც გავაპროტესტე. როცა ხორვატიამ გაიტანა გოლი, მას უფრო მივუახლოვდი და მისთვის კარგად გასაგონად, ხმამაღლა ვყვიროდი, "Go Croatia, fuck off Russia! რაზეც მომიბრუნდა, რატომ ჩამყვირიო. შემდეგ ჩვენს შორის მოხდა სიტყვიერი შელაპარაკება, მე ვაპროტესტებდი რუსეთის დროშის ფრიალს. "My country is occupied by your fucking country, so go, and wave your flag in Russia-მეთქი", - წერს ეკა ჭითანავა.

მისი ინფორმაციით, რუსეთის მოქალაქემ სამართალდამცავ უწყებებს შეატყობინა და ეკა ჭითანავას ფიზიკურ ძალადობაში დასდო ბრალი.

On.ge-ს მომხარი ფაქტი შსს-ში დაუდასტურეს და განუცხადეს, რომ გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.

ეკა ჭითანავს თქმით, მისი დაკითხვა ორშაბათამდე გადაიდო, რუსეთის მოქალაქე ტურისტი კი უკვე დაკითხეს. ასევე დაკითხულები არიან მოწმეებიც.