ჭუბერის რწმუნებულის, ნინო ვიბლიანის ცნობით, ადგილი, სადაც მთა ჩამოიშალა და მდინარემ ტერიტორია დატბორა, ამ ეტაპზე გარე სამყაროს მოწყვეტილია:

"ზარალს რაც შეეხება, არის უამრავი, რასაც დეტალურად ამ ეტაპზე ვერ ვიტყვით. საკომუნიკაციოდ, ხუთი ხიდი მთლიანად წაღებულია. მოგლეჯილია ნაპირზე არსებული აბსოლუტურად ყველა დამცავი ნაგებობა, თუკი რამე იყო".

ჭუბერის რწმუნებულმა On.ge-სთან საუბრისას თქვა, რომ წყალი შევარდა სახლებში, ეზოებში, თუმცა სრული სურათი არ იციან, რადგან გადაადგილებას ვერ ახერხებენ.

რწმუნებულის თქმით, მანამ სანამ ღვარცოფი ხეობაში ჩამოწვებოდა, სატელეფონო კომუნიკაციის შედეგად მოხდა რამდენიმე უბნის ევაკუაცია საშიში ზონებიდან.

საგანგებო სიტუაციების მართვის სამსახურის ცნობით, დაშავებულების შესახებ ინფორმაცია მათთან არ შესულა

ამ წუთებში, ადგილზე მობილიზებულია ყველა შესაბამისი სამსახური და მიმდინარეობს სტიქიის სალიკვიდაციო სამუშაოები. საგანგებო სიტუაციების მართვის სამსახური გადასულია მუშაობის განსაკუთრებულ რეჟიმზე.

მესტიის მუნიციპალიტეტის სოფელ ჭუბერში, იქ სადაც ნენსკრაჰესი შენდება, დღეს, 5 ივლისს მთის ნაწილი ჩამოიშალა, რამაც ღვარცოფი გამოიწვია.