ზაზა სარალიძე, რომელმაც შინაგან საქმეთა სამინისტროს ეზოში გაატარა ღამე, ამ წუთამდე პროტესტს აგრძელებს. On.ge-სთან საუბრისას ის ამბობს, რომ დღეს, 19 საათზე საპროტესტო აქცია იმ ხალხმა დაგეგმა, ვისაც სამართლიანობის აღდგენა სურს:

"აქცია ჩემი დაანონსებული არ არის, ვინაიდან, უკვე თავს ვიკავებ ხალხის შეწუხებისგან. ბოლო აქციები, რაც დავაანონსე, მაშინ პირდაპირ ზეწოლაზე წამოვიდა ხელისუფლება და შსს, დაარბიეს ჩემ გამო. შეერთებით შევუერთდები, ნებისმიერ დროს და ადგილზე".

სარალიძის განცხადებით, ის პროტესტს მანამდე გააგრძელებს, სანამ მიხეილ კალანდიას არ დააკავებენ. მისივე ცნობით, დღეს 14 საათზე დაგეგმილია შს მინისტრთან, მის მოადგილეებთან და დეპარტამენტის უფროსებთან შეხვედრა, რასაც მისი ადვოკატი, ნესტან ლონდარიძე და სახალხო დაცველის აპარატის წამომადგენელიც დაესწრებიან:

"ამოიღებენ იმ ჩვენებებს, რაც მიხეილ კალანდიას წინააღმდეგაა მიცემული, თავად მიხეილ კალანდიას ჩვენებებს. იმედია, სწორად შეაფასებენ და პირდაპირ გადადგამენ ნაბიჯს მისი დაკავებისკენ".

ზაზა სარალიძე დროებითი საპარლამენტო კომისიის მუშაობას დადებითად აფასებს:

"კომისიის მუშაობა არის დიდებული, მარტო იმიტომ ვაფასებ ამ კომისიას რომ პირდაპირ ეთერში გადაიცემა ყველა ადამიანის დაკითხვა".

"ნუ დავტოვებთ მას მარტოს სისტემის ყრუ რკინის კედელთან", - დღეს, 3 ივლისს ზაზა სარალიძის მხარდასაჭერად შსს-ს შენობასთან აქცია გაიმართება. მხარდამჭერები 19 საათზე შეიკრიბებიან.

2 ივლისს პარლამენტის საგამოძიებო კომისიამ შინაგან საქმეთა სამინისტროს რეკომენდაციით მიმართა ხორავას საქმის ფიგურანტის, მიხეილ კალანდიას წინააღმდეგ სისხლისსამართლებრივი დევნის დაწყების შესახებ. კომისიაში მიიჩნიათ, რომ შესაძლოა, კალანდია დავით სარალიძის ჯგუფურად მკვლელობის თანამონაწილეა.