საპარლამენტო უმრავლესობის წევრების შეფასებით, სტრუქტურული ცვლილებები პროფესიონალების განთავისუფლების ხარჯზე არ უნდა განხორციელდეს. დეპუტატების აზრით, ცვლილებები ეფექტურ და მოქნილ სტრუქტურებს უზრუნველყოფს.

ქართული ოცნების დეპუტატის გია ვოლსკის განცხადებით, სტრუქტურული ცვლილებები ბიუროკრატიული პროცესების გამარტივებისკენაა მიმართული, რაც ხარჯებს დაზოგავს.

"წარმატებული მუშაობის ფორმულა არ მდგომარეობს იმაში, რომ ხალხი ქუჩაში გაუშვა და უმუშევართა არმია გააძლიერო, ხალხის უმუშევრად დატოვება არ არის ამ სტრუქტურული ცვლილებების მიზანი, ამის მიზანია ბიუროკრატიის შემცირება, რომელიც შედეგებს მოიტანს", - განმარტა გია ვოლსკიმ.

გარემოს დაცვის კომიტეტის თავმჯდომარის კახა კუჭავას თქმით, უკეთესი იქნებოდა თუ გარემოს დაცვის სამინისტრო ცალკე გამოიყოფოდა, თუმცა ეს გადაწყვეტილება ახალმა პრემიერ-მინისტრმა არ მიიღო.

"ამის მიუხედავად, ძალიან მოქნილი მექანიზმი იქნება მთავრობის წარმატებით სამუშაოდ", - განაცხადა კახა კუჭავამ.

დეპუტატი ნუკრი ქანთარია ყველა ცვლილებას ეთანხმება, გარდა კულტურისა და განათლების შერწყმისა.

"სახელოვნებო დარგები, იმ დიდ ოკეანეში, რომელსაც განათლება ჰქვია, ჩაიკარგება", - განაცხადა ნუკრი ქანთარიამ.

პრემიერ-მინისტრის, მამუკა ბახტაძის მიერ წარდგენილი სამთავრობო ცვლილებების მიხედვით, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო უქმდება.

სამინისტრო ფუნქციები გადანაწილდება სამ უწყებაზე:

  • განსახლების ფუნქცია ინფრასტრუქტურისა და რეგიონული განვითარების სამინისტროს შეუერთდება;
  • მიგრაცია - შსს-ს;
  • სოციალური პოლიტიკა - ჯანდაცვის სამინისტროს.

საპარლამენტო ოპოზიციური პარტიები, ევროპული საქართველო და ნაციონალური მოძრაობა მთავრობის სტრუქტურულ ცვლილებებს, რომელიც პარლამენტში დღეს დარეგისტრირება, მხარს არ დაუჭერს. პარტია პატრიოტთა ალიანსი გადაწყვეტილებას მას შემდეგ მიიღებს, რაც სტრუქტურულ ცვლილებებთან ერთად მინისტრთა ახალი კაბინეტიც გახდება ცნობილი.