არასამთავრობო ორგანიზაციები, ოზურგეთის საკრებულოს ნაციონალური მოძრაობის წევრის, ბესიკ ქათამაძის ცემის საქმეზე შეშფოთებას გამოხატავენ. ხელმომწერი ორგანიზაციები სამართალდამცავ ორგანოებს მოუწოდობენ, გამოიძიონ საქმე ეფექტურად და გამოავლინონ ინციდენტში მონაწილე ყველა პირი.

ქათამაძემ 15 ივნისს განაცხადა, რომ ის ქართული ოცნების წევრებმა სცემეს. ენმ-ს ოზურგეთის ორგანიზაციის თავმჯდომარემ კი On.ge-სთან საუბარში განაცხადა, რომ ქათამაძეზე ფეისბუქპოსტების გამო იძალადეს და თავში რკინის საგანს ურტყამდნენ.

საქმეზე ჩატარებული ოპერატიული საგამოძიებო მოქმედებების შედეგად, შინაგან საქმეთა სამინისტრომ ბრალი წარუდგინა ოზურგეთის საკრებულოს დეპუტატს ქართული ოცნებიდან, ტარიელ აროშაძეს, რომელიც სასამართლომ გირაოს სანაცვლოდ გაათავისუფლა. გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს.

არასამავრობო ორგანიზაციების განცხადებაში წერია, რომ ქათამაძეზე თავდასხმა პირველი შემთხვევა არ არის და ამგვარი ინციდენტები ხშირია წინასაარჩევნო პერიოდებში, მაგალითად კი 2016 წლის 22 მაისს კორცხელში განხორციელებული თავდასხმა მოიყვანეს.

ხელმომწერი არასამთავრობო ორგანიზაციები არიან:

  • საქართველოს დემოკრატიული ინიციატივა (GDI);
  • საფარი;
  • ტოლერანტობისა და მრავალფეროვნების ინსტიტუტი (TDI);
  • მედიის განვითარების ფონდი (MDF);
  • კონსტიტუციის 42-ე მუხლი;
  • დემოკრატიისა და უსაფრთხო განვითარების ინსტიტუტი (IDSD);
  • თანასწორობის მოძრაობა;
  • საქართველოს რეფორმების ასოციაცია (GRASS).