პარლამენტის თავმჯდომარე ირაკლი კობახიძე ჟურნალისტებთან საუბრისას ადასტურებს, რომ მტავრობაში იქნებიან ახალი სახეები. ის ამბობს, რომ ფინანსთა მინისტრის მოვალეობის შემსრულებელს, დიმიტრი ქუმსიშვილს აუცილებლად სხვა კანდიდატი ჩაანაცვლებს:

"ახალი სახეები ყველა შემთხვევაში იქნებიან, სულ მცირე, დასასახელებელია ახალი კანდიდატი ფინანსთა სამინისტროსთვის. იქნებიან სხვა ახალი კანდიდატებიც. ეს არის ბატონი მამუკას პოზიცია. თუმცა, რა მასშტაბის იქნება ეს ცვლილებები, ამას ვიხილავთ ჩვენ როდესაც თავად პრემიერ-მინისტრობის კანდიდატი დაასახელებს მთავრობის შემადგენლობას".

ირაკლი კობახიძის ცნობით, დღეს ან ხვალ ექნება გუნდს კონსულტაციები:

"ორშაბათს ბიუროს სხდომაზე უკვე დავამტკიცებთ მთავრობის განხილვის გრაფიკს. მთავარია, მანამდე, მამუკა ბახტაძემ წარმოადგინოს მთავრობის შემადგენლობა".

პრემიერ-მინისტრობის კანდიდატად მამუკა ბახტაძე 14 ივნისს წარადგინეს. მან უნდა შეარჩიოს მინისტრთა კანდიდატურები და საქართველოს პარლამენტს წარუდგინოს მთავრობის განახლებული შემადგენლობა, ნდობის მისაღებად. მთავრობის შემადგენლობასთან ერთად წარდგენილი უნდა იყოს სამთავრობო პროგრამა.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.