HaHa ემოციების წნეხმა დაურ კოვეს შემდეგ, აფხაზეთის დე ფაქტო პრეზიდენტზეც იმოქმედა. რაულ ხაჯიმბას პოსტი აღარ იძებნება. HaHa ომი ხაჯიმბას წინააღდეგ დღეს დაიწყო, როცა დე ფაქტო პრეზიდენტის ფეისბუქგვერდზე რუსეთის მსოფლიო ჩემპიონატზე გადაღებული ფოტოები გამოქვეყნდა. ხაჯიმბა მეორე თვითგამოცხადებულ პრეზიდენტთან, ანატოლი ბიბილოვთან ერთად ჩემპიონატს ესწრება.

დე ფაქტო პრეზიდენტები, ვლადიმერ პუტინთან და სხვა ლიდერებთან ერთად საპატიო ლოჟიდან ადევნებენ თამაშს თვალს. ინტერნეტმომხმარებლებს არ გაკვირვებიათ, როცა ხაჯიმბას გვერდზე, პუტინთან ერთად გადაღებული ფოტოებიც გამოქვეყნდა.

HaHa ომი თავდაპირველად აფხაზეთის საგარეო საქმეთა დე ფაქტო მინისტრის, დაურ კოვეს წინააღმდეგ დაიწყო. კოვემ ფეისბუქზე სირიის მიერ, აფხაზეთის დამოუკიდებლად აღიარება აღნიშნა. სიცილმა დე ფაქტო მინისტრი აიძულა პოსტი წაეშალა.

HaHa ომის მორიგი შეტევა საქართველოს ყოფილ პრემიერ-მინისტრზე, გიორგი კვირიკაშვილზე განხორციელდა, რომელმაც არასამთავრობოების მიერ წულუკიანის გადადგომის მოთხოვნა გააკრიტიკა.

ამის შემდეგ HaHa ემოციებმა იუსტიციის მინისტრის, ამჟამად მოვალეობის შემსრულებლის, თეა წულუკიანის პოსტზე გადაინაცვლეს და ყოფილი პროკურორის, ირაკლი შოთაძის ქებას დასცინეს.

მოგვიანებით HaHa პროტესტმა ქუჩაში გადაინაცვლა და იუსტიციის სახლთან HaHa ემოციებით "შეიარაღებულმა" მოქალაქეებმა თეა წულუკიანის გადადგომა მოითხოვეს.