ბოლო ერთ წელში თბილსერვის ჯგუფის თანამშრომლებმა თბილისის დანაგვიანებისთვის 5 243 ჯარიმა გამოწერეს. ჯარიმების თანხის საერთო რაოდენობა 520 430 ლარი შეადგინა. 2017 წლის აპრილიდან 2018 წლის აპრილის ჩათვლით მონაცემები On.ge-მ თბილისის მერიიდან გამოითხოვა.

მერიიდან მიღებული ინფორმაციით ირკვევა, რომ ჯარიმების 71 პროცენტი (3 707) საქართველოს მოქალაქეებზე გამოიწერა, დარჩენილი 29 პროცენტი (1 536) კი - სხვა ქვეყნის მოქალაქეებზე.

როგორც მერიიდან მიღებული საჯარო ინფორმაციიდან ირკვევა, აპრილში დაჯარიმებული ადამიანებისა და სანქციის ოდენობები სრული თვის მონაცემს არ ასახავს. ბოლო ერთი წლის განმავლობაში კი ყველაზე ცოტა ადმიანი (288) 2017 წლის ოქტომბერში დაჯარიმდა, მაშინ, როცა ქვეყანაში არჩევნები იმართებოდა. წერილში არ არის გამოყოფილი რამდენია სხვა ქვეყნის მოაქლაქეებზე გამოწერილი ჯარიმების წილი.

On.ge-მ თბილისის მერიას თბილსერვის ჯგუფის ზედამხედველობის სამსახურის ქვეით ინსპექტორების საქმიანობასთან დაკავშირებით რამდენიმე სხვა კითხვითაც მიმართა. სხვა საკითხები საჯარო ინფორმაციის გაცემაზე პასუხისმგებელმა პირმა უპასუხოდ დატოვა.