საქართველოს პრემიერ-მინისტრის თქმით, არჩილ ტატუნაშვილის ოკუპირებულ ცხინვალში გარდაცვალებაზე პასუხისმგებლობა რუსეთს ეკისრება. პრემიერი აღნიშნავს, რომ ევროსაბჭოს არაერთ რეზოლუციაშია აღნიშნული, რომ ქვეყანა, რომელიც კონტროლს ახორციელებს, ადამიანის უფლებებზე პასუხისმგებლობა მას ეკისრება.

"მკვლელობა, არის ძალიან დიდი ტრაგედია, მაგრამ მას ჰყავს კონკრეტული პასუხისმგებლები", - თქვა პრემიერმა.

საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა, რომ საქართველო კვლავ გააგრძელებს ქართულ-ოსური და ქართულ-აფხაზური შერიგების პოლიტიკას. მან პარლამენტსა და შერიგების საკითხებში სახელმწიფო მინისტრს, ქეთევან ციხელაშვილს მოუწოდა კვლავ გააგრძელონ ამ მხრივ მუშაობა.

"რა თქმა უნდა, ჩვენი სახელმწიფო იქნება ძალიან მტკიცე იმ კონკრეტულად იმ ადამიანების მიმართ, რომლებმაც ჩაიდინეს დანაშაული. და რა თქმა უნდა, სამართლებრივი კუთხით გადადგამს იმ ნაბიჯებს, მათ შორის საერთაშორისო მასშტაბით, რომ დამნაშავეები იქნან დასჯილი", - განაცხადა პრემიერმა.

ის მთავრობის სხდომაზე არჩილ ტატუნაშვილის გარდაცვალების საქმესაც გამოეხმაურა. მისი თქმით, მტრებმა ვერ გატეხეს ის, ვერ შელახეს მისი ღირსება.

არჩილ ტატუნაშვილი 22 თებერვალს ცხინვალის ციხეში გარდაიცვალა. საქართველოს სახელმწიფო უწყებების წარმომადგენლების თქმით, ის მოკლეს. მისი ცხედარი ოკუპირებული ცხინვალის დე ფაქტო ხელისუფლებამ საქართველოს ხელისუფლებას, წითელი ჯვრის დახმარებით, თითქმის ერთი თვის შემდეგ გადასცა.