ცხივალის რეგიონის დე ფაქტო პრეზიდენტის წარმომადგენელის, მურატ ჯიოევის თქმით, საქართველოს ხელისუფლებამ და სხვადასხვა პოლიტიკურმა ძალამ არჩილ ტატუნაშვილის გარდაცვალებაზე პროპაგანდისტული კამპანია დაიწყეო. ჯიოევის კომენტარის თარგმანს ტელეკომპანია რუსთავი 2 ავრცელებს.

"ეს ყველაფერი კეთდება იმისთვის, რომ გამოიწვიონ საერთაშორისო აჟიოტაჟი. სამწუხაროდ, 2008 წლის აგვისტოს მოვლენების შემდეგ, როდესაც სამხრეთ ოსეთის ერის ტრაგედია მთელმა მსოფლიომ გაიგო და ელჩ ჰაიდი ტალიავინის ხელმძღვანელობით ევროკავშირის დამოუკიდებელმა კომისიამ აღიარა, რომ ომი საქართველომ დაიწყო, ასეთი ფართო საერთაშორისო ცნობადობა არ ყოფილა. საერთაშორისო ორგანიზაციებს სათანადო ყურადღება არ მიუქცევიათ ჩვენი არაერთი მიმართვისთვისაც, რომ ჩვენი ერის წინააღმდეგ საქართველოს აგრესია დაეგმოთ. არჩილ ტატუნაშვილთან ჩვენს შესაბამის უწყებებს შეკითხვები ჰქონდათ, დაინტერესებული იყვნენ, რომ ინფორმაცია მიეღოთ, თუმცა სამწუხაროდ, მისმა გარდაცვალებამ ინფორმაციის მიღების შესაძლებლობა წაგვართვა", - განაცხადა მურატ ჯიოევმა.

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა. ტატუნაშვილის გარდაცვალებიდან 9 დღეა გასული, თუმცა ცხინვალის დე ფაქტო ხელისუფლება ცხედარს ოჯახს ჯერ კიდევ არ გადასცემს.