საქართველოს საგარეო საქმეთა სამინისტროს ინფორმაციით, გერმანიაში ქართველმა დიასპორამ მინისტრთან შეხვედრისას აღნიშნეს, რომ მზად არიან ვიზალიბერალიზაციის ინფორმირების კამპანიაში ჩაერთონ. მთავრობა გეგმავს, რომ მოქალაქეებს ვიზალიბერალიზაციაზე სწორი წარმოდგენა საინფორმაციო კამპანიებით შეუქმნას.

"გერმანიაში ჩვენ გვაქვს ამის კარგი შესაძლებლობა წელს, რადგანაც ჩვენ ვართ საპატიო სტუმარი ფრანკფურტის წიგნის ბაზრობაზე და მოგეხსენებათ, რომ წელს ასევე პირველად ისტორიაში მიუნხენის უსაფრთხოების კონფერენციის თანაორგანიზებით იმართება სპეციალურად საქართველოსადმი მიძღვნილი ღონისძიება - პოლიტიკა და ლიტერატურა, რომელიც ჩვენ გვაძლევს საშუალებას, რომ საქართველო წარმოვაჩინოთ გერმანული საზოგადოების წინაშე პოზიტიური კუთხით და რა თქმა უნდა, აქაც გავაჩინოთ მეტი პოზიტიური დამოკიდებულება ზოგადად საქართველოს ინტეგრაციული პროცესების მიმართ", - აღნიშნა საგარეო საქმეთა მინისტრმა, მიხეილ ჯანელიძემ.