"ეს განცხადებები არის ძალიან სამწუხარო და სამწუხაროდ, ეს განცხადებები გარკვეულ ეჭვებს ბადებს", - განაცხადა პარლამენტის თავმჯდომარემ, ირაკლი კობახიძემ აფგან მუხტარლის განცხადებაზე. მისი თქმით, პარლამენტი ამ მიმართულებით ზედამხედველობას ახორციელებს.

"ჩვენ ველოდებით გამოძიების შედეგებს და გვაქვს ძალიან დიდი იმედი, რომ ამ საქმეს მოეფინება საბოლოოდ ნათელი".

კობახიძის განმარტებით, აშშ-ში ვიზიტისას, ერთ-ერთ შეხვედრაზე აფგან მუხტარლის საქმეზე მას საუბარი ჰქონდა:

ჩვენ საქმის კურსში ჩავაყენეთ ადმინისტრაციის წარმომადგენლები იმის თაობაზე, თუ როგორ მიმდინარეობს საქმის გამოძიება, როგორ არის ამ ყველაფერში ჩართული პარლამენტი და ჩვენ იქაც გამოვთქვით იმედი, რომ საბოლოო ჯამში ეს გამოძიება წარმატებით დასრულდება".

აფგან მუხტარლი თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა. ინტერვიუ მუხტარლისთან რუსთავი 2-მა ჩაწერა და თარგმანიც მას ეკუთვნის.

აფგან მუხტარლი თბილისიდან 29 მაისს გაუჩინარდა და მეორე დღეს ბაქოს ციხეში აღმოჩნდა. მას ექვსწლიანი პატიმრობა მიუსაჯეს.

გაიგეთ მეტი: