თბილისის მერის, კახა კალაძის თქმით, სისტემა, რომელიც მუნიციპალიტეტში შესრულებული სამუშაოების ხარისხს აკონტროლებს "სათანადოდ" ვერ მუშაობს. ამის შესახებ კალაძემ დღეს, 31 იანვარს, მეტროსადგურ ვარკეთილის ჩამონგრევის მეორე დღეს, თბილისის მთავრობის სხდომაზე ისაუბრა.

"ნათელი მაგალითია, როგორც გუშინ მომხდარი შემთხვევა, ისე ის კონკრეტული პროექტები, რომლებიც ჩვენ დავათვალიერეთ. მაგალითად, მუხიანის სპორტკომპლექსი, ბაღები და ა.შ", - განაცხადა კახა კალაძემ და დასძინა, რომ ცვლილებებზე მუშაობა უკვე დაწყებულია.

მისივე თქმით, თბილისს ისეთი მოდელი და სისტემა სჭირდება, რომლითაც შესრულებული სამუშაოების ხარისხის მაღალ დონეზე შეამოწმებს და ეყოლება კონკრეტული პასუხისმგებელი პირები.

"მინდა გთხოვოთ [მოადგილეებს], რომ დავაჩქაროთ და 10 დღეში, ორ კვირაში უკვე წარმოადგინოთ სურათი, რომელიც მოგვცემს იმის შესაძლებლობას, რომ მუნიციპალური ინფრასტრუქტურული პროექტების შესრულების ხარისხი ეფექტური იყოს და კონტროლიც ამავდროულად, ეფექტური იქნება", - აღნიშნა თბილისის მერმა.

გუშინ, 30 იანვარს თბილისში, მეტროსადგურ ვარკეთილში, რომელიც რამდენიმე თვის წინ გარემონტდა ჭერი ჩამოინგრა. ინციდენტი პიკის საათში მოხდა, დაშავდა 14 ადამიანი, მათ შორის პოლიციელი. მეტრო დრეს დილით 6 საათიდან სრული დატვირთვით მუშაობს.