პანკისში სპეცოპერაციის შედეგად მოკლული თემირლან მაჩალიკაშვილი დღეს, 11 იანვარს, რამდენიმე წუთის წინ დაკრძალეს. დაკრძალვას 100-ეულობით ადამიანთან ერთად მედიაც ესწრებოდა.

მაჩალიკაშვილი გუშინ, 10 იანვარს, თბილისში, საავადმყოფოში, გარდაიცვალა. ის თითქმის ორი კვირის განმავლობაში კომატოზურ მდგომარეობაში იყო. მაჩალიკაშვილი სპეცრაზმელმა 26 დეკემბერს პანკისის ხეობაში ჩატარებული სპეცოპერაციის დროს სახლში თავის არეში დაჭრა.

სახელმწიფო უსაფრთხოების სამსახურის ინფორმაციით, მაჩალიკაშვილი და პანკისში სპეცოპერაციის დროს დაკავებული პირები დაკავშირებულები არიან თბილისში, ისანში, სპეცოპერაციის დროს ლიკვიდირებულ პირებთან.

21-22 ნოემბრის ისნის სპეცოპერაციის შედეგად, რომელიც დაახლოებით 20 საათის განმავლობაში მიმდინარეობდა, დაიღუპა ერთი სპეცრაზმელი და დაიჭრა ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი. ლიკვიდირებულთაგან ერთ-ერთი ახმედ ჩატაევია.

სუს-ის ინფორმაციით, ისნის სპეცოპერაციის დროს გარდაცვლილი პირები საქართველოსა და თურქეთში დიპლომატიური კორპუსის წარმომადგენლებზე ტერორისტულ აქტებს გეგმავდნენ.

გაიგეთ მეტი ისნის სპეცოპერაციაზე.