პარტია ქართული ოცნების ლიდერი და დეპუტატი მამუკა მდინარაძე პატრიარქის საშობაო ეპისტოლის მესიჯს ეხმაურება და ამბობს, რომ საჭიროა დაბალანსდეს ნარკოპოლიტიკა რათა რისკები გამოირიცხოს:

"პატრიარქის ეს მოწოდება კიდევ უფრო მეტად შეგვძენს იმის უნარს, რომ ერთის მხრივ დავაბალანსოთ ადამიანის უფლებათა დაცვის ინტერესი და მეორეს მხრივ ნარკოპოლიტიკასთან მიმართებით, გამკაცრდეს, თუნდაც გასაღებასთან დაკავშირებით. ლიბერალიზმი კარგია მოხმარების, რომელსაც არ სჭირდება დაჭერა და სახელმწიფოსგან თანადგომას საჭიროებს".

პატრიარქის ეპისტოლე შეაფასა პარლამენტის თავმჯდომარემ, ირაკლი კობახიძემ. მან ქრისტეს შობისადმი მიძღვნილი ლიტურგიის დასრულების შემდეგ განაცხადა, რომ პატრიარქმა ისეთ მნიშვნელოვან საკითხებზე გაამახვილა ყურადღება ეპისტოლეში, რაზეც პარლამენტი მუშაობს:

"გზავნილები, რომლებიც იყო გაჟღერებული ეპისტოლეში, იქნება ჩვენთვის ყურადსაღები და გათვალისწინებული მუშაობის პროცესში".

საქართველოს მართლმადიდებელი ეკლესიის პატრიარქი, ილია მეორე მიიჩნევს, რომ ნარკოპოლიტიკამ "ამ უმძიმეს სენთან მიმართებით" უარყოფითი განწყობა უნდა შექმნას და ახალგაზრდები დაიცვას.

"მაშინ, როდესაც ქვეყანა დემოგრაფიული კატასრტროფის წინაშე დგას, ყველას განსაკუთრებული სიფრთხილე და წინდახედულება გვმართებს, რათა აღნიშნული პრობლემისადმი სწორი კომპლექსური მიდგომა განხორციელდეს და რეალური, შედეგის მომტანი ნაბიჯები გადაიდგას", - წერია საშობაო ეპისტოლეში.