ილიაუნის პროფესორის, მარიკა წივწივაძის მკვლელობისთვის პასუხისმგებლობა სახელმწიფოსაც დაეკისრა. ამის შესახებ ინფორმაციას, საფარის აღმასრულებელი დირექტორი, ბაია პატარაია ავრცელებს.

"შსს-მ რომელმაც იცოდა, თუ რა ძალადობას ექვემდებარებოდა მარიკა, მაგრამ არაფერი გააკეთა მის დასაცავად, გამტყუნებულია თბილისის საქალაქო სასამართლოს მიერ", - ნათქვამია პატარაიას პოსტში.

მისივე თქმით, შსს-ს დაეკისრა მორალური ზიანის ანაზღაურება დედისათვის და ყოველთვიური სარჩოს გადახდა დაობლებული შვილისათვის სრულწლოვანებამდე.

მარიკა წივწივაძის საქმე

2014 წლის 17 ოქტომბერს მარიკა წივწივაძე მისმა ყოფილმა ქმარმა, ლაშა მაღრაძემ სამსახურში, ილიაუნიში, ცეცხლსასროლი იარაღით მოკლა და შემდეგ თავი მოიკლა.

საფარის ინფორმაციით, 2013 წლიდან მოყოლებული, მარიკა წივწივაძე ლაშა მაღრაძესთან არარეგისტრირებულ ქორწინებაში იყო. ქმარი წივწოვაძეს მუდმივად უსწორდებოდა ფიზიკურად და სიტყვიერ შეურაცხყოფას აყენებდა, ასევე რამდენჯერმე მას და მის შვილს მკვლელობით დაემუქრა.

მსხვერპლმა პოლიციას ჯერ კიდევ ლაშა მაღრაძესთან თანაცხოვრების პერიოდში, 2014 წლის აპრილში მიმართა. გაშორების და თბილისში წამოსვლის შემდეგ, მარიკა წივწივაძემ ყოფილი ქმარი მუქარას აგრძელებდა.

საფარის თქმით, ერთხელ წივწივაძემ პოლიცია გამოიძახა, თუმცა პოლიციამ შემაკავებელი ორდერი ვერ გამოწერა, რადგან მაღრაძე რუსთავში ცხოვრობდა და ორდერიც რუსთავში უნდა გამოწერილიყო.

ყოფილი ქმრის თავდასხმების გამო წივწივაძეს არაერთხელ გამოუძახია პოლიცია, თუმცა არც ერთ გამოძახებას კანონმდებლობით გათვალისწინებული რეაგირება არ მოჰყოლია.