აჭარის მთავრობის პრესსამსახურის ინფორმაციით, 2016 წლის ზაფხულის სეზონთან დაკავშირებით ბათუმის მიმართულებით ფრენები მნიშვნელოვნად გაიზარდა. გარდა აქამდე არსებული რეგულარული ფრენებისა, დამატებითი ჩარტერული და რეგულარული ფრენები სრულდება ისრაელიდან, ირანიდან, უკრაინიდან, ყაზახეთიდან, რუსეთიდან და არაბეთის გაერთიანებული საამიროებიდან.

აჭარის მთავრობის ცნობით, გაიზარდა ჩარტერული ფრენების რაოდენობა ისრაელიდან ბათუმის მიმართულებით, ფრენებს კომპანიები Israir Airlines და El Al Israel Airlines ასრულებს, რომელსაც ემატება ავიკომპანია Arkia, რომელიც წინა წელს განხორციელებული სამთვიანი ფრენების ნაცვლად წელს 10 თვის განმავლობაში შეასრულებს პირდაპირ ფრენებს თელ-ავივსა და ბათუმს შორის. ახალი ავიაკომპანიები შემოვიდა ყაზახეთიდანაც. ივნისში ფრენა დაიწყო ყაზახეთიდან ორმა ახალმა ავიაკომპანიამ - Scat-მა და Skybus-მა ორი დიდი ქალაქიდან - ასტანადან და აქტაუდან. ივნის-ივლისში ფრენები ყაზახეთის ოთხი ქალაქიდან - ალმაატადან, ყარაგანდადან, ატირაუდან და კოსტანაიდან შესრულდება. გაზრდილი მოთხოვნის შესაბამისად, დაინიშნა ფრენები არაბეთის გაერთიანებული საემიროებიდანაც. ივლისიდან, ჩარტერულ რეისებს შარჟა-ბათუმი-შარჟას მიმართულებით ავიაკომპანია Air Arabia შეასრულებს. ახალი მიმართულებები დაემატა ასევე რუსულ კომპანიას Ural Airline-ს, რომელიც ჩარტერულ ფრენებს უკვე ეკატერინგბურგიდან და სამარადან ასრულებს. გასული წლის მსგავსად, პოლონეთის ყველაზე მსხვილი ტურ-ოპერატორი Rainbow Tours წელსაც აგრძელებს ჩარტერულ ფრენებს. ბათუმის მიმართულებით ივნის-ივლისის თვეში კვირაში 71 ფრენაა დანიშნული.

საერთაშორისო ფრენებს ბათუმის აეროპორტში ასევე ემატება შიდა ფრენებიც, კერძოდ, 21 ივნისიდან ბათუმის მიმართულებით შიდა ფრენები თბილისიდან და ნატახტარიდან შესრულდება.