დაახლოებით ერთი თვის წინ, სვაროვსკის ხელნაკეთი კრისტალებით გაწყობილ კაბაში გამოწყობილი სარა იდანი მის სამყაროს კონკურსზე ერაყს წარმოადგენდა.

"მეცხრე ცაზე ვიყავი, ყოველთვის ვოცნებობდი ამაზე," - ამბობდა იდანი, თუმცა უცბად ყველაფერი შეიცვალა და ყველაფერი სელფის გამო მოხდა.

სარა იდანმა და მის ისრაელმა, ადარ გენდლსმანმა წინასაკონკურსო ფოტოსესიაზე ფოტო გადაიღეს.

"ვუთხარი, მოდი ფოტო გადავიღოთ და ჩვენს ხალხს დავანახოთ, რომ პრობლემა არ გვაქვს და მშვიდობის ელჩები ვართ," - უთხრა იდანმა CNN-ს, ფოტოს აღწერაში კი დაწერა: "მშვიდობა და სიყვარული მის ერაყისგან და მის ისრაელისგან."

რეაქცია კი ის არ აღმოჩნდა, რასაც მოელოდა.

კონკურსამდე ექვსი დღით ადრე მის ერაყის ორგანიზაციიდან მუქარით გაიღვიძა, რომელიც აფრთხილებდა, რომ ტიტულს ჩამოართმევდა, თუ ფოტოს არ წაშლიდა.

სხვები სიცოცხლის მოსპობით ემუქრებოდნენ.

იდანმა დაუყოვნებლივ დაურეკა ოჯახს, რომელიც ერაყში ცხოვრობდა და ქვეყნიდან წამოსვლა სთხოვა. მისივე თქმით, ონლაინში მუქარა აქამდეც მიუღია ბიკინის ჩაცმის გამო, თუმცა ეს მის ისრაელთან სელფი იყო და ყველაზე სერიოზული შედეგი ჰქონდა.

ერაყსა და ისრაელს არანაირი ფორმალური დიპლომატიური ურთიერთობა არ აქვთ, ამიტომ ფოტომ საერთაშორისო პროტესტი გამოიწვია.

ფოტოზე ასეთ გამოხმაურებას არ ელოდა და მოკვლის მუქარებმაც შეაშინა, თუმცა ფოტოს წაშლაზე უარი თქვა.

მეორე დღეს, იდანი განმარტებითი პოსტით ხსნიდა, რომ ისრაელის ხელისუფლებას და მის პოლიტიკას არ აღიარებს და ბოდიშიც მოუხადა მათ, ვინც ფოტო პალესტინის საკითხზე თავდასხმად მიიღო.

დღემდე ემუქრებიან, თუმცა შექმნილი პრობლემებისა და შიშის მიუხედავად ფოტოს დაპოსტვას არ ნანობს.