ერთიანი ნაციონალური მოძრაობის წევრი, ხატია დეკანოიძე ამბობს, რომ ბიუროკრატიის შემცირების საკითხზე ისინი დიდი ხანია საუბრობენ. ასე გამოეხმაურა დეკანოიძე ოთხი სამინისტროს გაუქმებას On.ge-სთან საუბრისას.

"მთავარია, რომ შემცირდეს ბიუროკრატია, შემცირდეს ხარჯი და ეს არ იყოს ავტომატური გაერთიანება იმიტომ, რომ ვიღაცას ასე უნდოდა", - აღნიშნა დეკანოიძემ.

მისი თქმით, მთავრობის დასახელებული მინისტრები საქართველოს ყოფილ პრემიერ-მინისტრთან, ბიძინა ივანიშვილთან დაკავშირებული პირები არიან. დეკანოიძე ამბობს, რომ ფინანსთა მინისტრის თანამდებობაზე დასახელებული საქართველოს რკინიგზის მოქმედი დირექტორი, მამუკა ბახტაძე უტა ივანიშვილის მეგობარია.

"ბახტაძის პერიოდში ერთ-ერთი ყველაზე მნიშვნელოვანი კომპანიის, საქართველოს რკინიგზის, მოგება განახევრდა, 2016 წელს კი პრაქტიკულად მინუსში წავიდა", - ასე აფასებს დეკანოიძე მომავალი ფინანსთა მინისტრის ამ დროინდელ საქმიანობას.

მისი თქმით, მომავალ შინაგან საქმეთა მინისტრს, გიორგი გახარიას სამართალდამცავი სტრუქტურების მიმართულებით გამოცდილება არ აქვს.

"უნდა ვივარაუდოთ, რომ მთავრობა, რომელიც პრემიერ-მინისტრმა წარმოადგინა პრაქტიკულად გამოცვლილია საქართველოს მმართველის [ბიძინა ივანიშვილის] მიერ", - ამბობს ნაციონალური მოძრაობის წევრი.

დღეს, 13 ნოემბერს, საქართველოს პრემიერ-მინისტრმა, გიორგი კვირიკაშვილმა ოთხი სამინისტროს გაუქმება დაადასტურა.

გაუქმებულ სამინისტროებს შორის მოხვდა:

  • ენერგეტიკის სამინისტრო;
  • სპორტისა და ახალგაზრდობის საქმეთა სამინისტრო;
  • გარემოს დაცვისა და სოფლის სამინისტრო გაერთიანდა;
  • ევროპულ და ევროინტეგრაციის სამინისტრო.