საფრანგეთის ნაციონალურმა კრებამ ნაციონალური ფრონტის ლიდერს, მარინ ლე პენს პარლამენტარის იმუნიტეტი მოხსნა იმის გამო, რომ ტვიტერზე ე.წ ისლამური სახელმწიფოს ძალადობის ამსახველი ფოტო გამოაქვეყნა. ამის შესახებ ინფორმაციას France24 ავრცელებს. ასამბლეის 22-წევრიანმა კომიტეტმა იმუნიტეტის მოხსნას ოთხშაბათს უყარა კენჭი.

ნაციონალური ფრონტის ლიდერმა 2015 წელს ტვიტერზე გამოაქვეყნა სამი ფოტო, რომლებზეც ISIS-ის მიერ ჩადენილი ძალადობა იყო ასახული. ერთ-ერთ ფოტოზე ჩანდა ამერიკელი ჟურნალისტი ჯეიმს ფოული, რომელსაც ექსტრემისტებმა თავი მოკვეთეს.

"ეს დაეშია!", - ამ წარწერით გამოაქვეყნა მან ფოტო და ISIS-ის არაბული აბრევიატურა გამოიყენა. უარყოფითი გამოხმაურების გამო, ლე პენმა ფოტოები მალევე წაშალა.

საფრანგეთის ხელისუფლებამ ამ ფაქტზე გამოძიება დაიწყო, მაგრამ ფრანგ პოლიტიკოსს ბრალი ვერ წაუყენეს, რადგან ის ევროპარლამენტის დეპუტატი იყო და შესაბამისი იმუნიტეტი იცავდა.

2017 წლის საპრეზიდენტო არჩევნების მეორე ტურში ემანულე მაკრონის კონკურენტი მარინ ლე პენი იყო. ის ულტრა-მემარჯვენე შეხედულებებით გამოირჩევა. საარჩევნო კამპანიის დროს ის ამბობდა, რომ სურდა რეფერენდუმის ჩატარება, ქვეყნის მიერ ევროკავშირის წევრობის გადახედვის მიზნით და ასევე, შენგენის ზონიდან გასვლასთან დაკავშირებით.