სამართალდამცველებმა ქვეყანაში დიდი რაოდენობით ცეცხლსასროლი იარაღის, ვაზნებისა და დენთის უკანონოდ შემოტანის მცდელობა აღკვეთეს. დაკავებულია ორი პირი, რომელთაგან ერთი უცხო ქვეყნის მოქალაქეა. ინფორმაციას შსს ავრცელებს.

შსს-ს ცნობით, ჩხრეკა სარფის საბაჟოსა და ფოთის საზღვაო პორტში ჩატარდა. ბრალდებულების ავტომობილების დათვალიერებისას პოლიციამ დიდი ოდენობით საბრძოლო მასალა და იარაღი ამოიღო.

გამოძიება იარაღის უკანონო შეძენა-შენახვა-გადაზიდვისა და საბაჟო წესების დარღვევით საზღვარზე უკანონოდ გადმოტანის მცდელობის მუხლებით მიმდინარეობს. დაკავებულებს 9 წლამდე ვადით პატიმრობა ემუქრებათ.

"შინაგან საქმეთა სამინისტროს ცენტრალური კრიმინალური პოლიციის დეპარტამენტისა და ფინანსთა სამინისტროს შემოსავლების სამსახურის საბაჟო დეპარტამენტის თანამშრომლებმა, დიდი რაოდენობით ცეცხლსასროლი იარაღის საქართველოში უკანონოდ შემოტანის ფაქტი აღკვეთეს და ორი პირი დააკავეს, მათგან ერთ-ერთი უცხო ქვეყნის მოქალაქეა.

სამართალდამცველებმა, „სარფის“ საბაჟო გამშვები პუნქტისა და ფოთის საზღვაო ნავსადგურში მდებარე გაფორმების ეკონომიკური ზონის ტერიტორიებზე, ბრალდებულების კუთვნილი ავტომობილების დათვალიერების შედეგად, ნივთმტკიცებად ამოიღეს — 500-მდე საბრძოლო ვაზნა, 2 პნევმატური სპორტული იარაღი, 2 000-ზე მეტი ტყვიის მასრა, 900-მდე მასრის ჭურვი და ცეცხლსასროლი იარაღის ვაზნებისთვის განკუთვნილი 2,5 კილოგრამი დენთი.

გამოძიება სისხლის სამართლის კოდექსის 236-ე, 19-236-ე და 19-214-ე მუხლებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს", — ნათქვამია უწყების გავრცელებულ განცხადებაში.