ვაკის პარკის ტრაგედიის საქმეზე მსჯავრდებული, "გრინსერვისი+"-ის ყოფილი დირექტორი, ლაშა ფურცხვანიძე საპატიმროდან ვადაზე ადრე გაათავისუფლეს. ინფორმაცია "ტვ პირველის" ჟურნალისტთან საუბრისას თავად ფურცხვანიძემ დაადასტურა.

"გუშინ დავტოვე საპატიმრო. სამაჯურით გამომიშვეს. უდოს კომისიას (პირობით ვადაზე ადრე გათავისუფლების კომისია) მივმართე და მათი გადაწყვეტილება იყო. იმ კომპანიაში ["გრინსერვისი+"-] არ დავბრუნდები, თუმცა ვერ გეტყვით, რას ვაპირებ, მომავალი გვაჩვენებს. ჯერ-ჯერობით ოჯახთან ვარ," — განაცხადა ფურცხვანიძემ "ტვ პირველთან" საუბრისას.

უბედური შემთხვევა 2022 წლის 13 ოქტომბერს ვაკის პარკში მოხდა. ბავშვებს შადრევანში ბურთი ჩაუვარდათ. მისი ამოსატანად შესულ მოზარდებს დენმა დაარტყათ. 13 წლის მარიტა მეფარიშვილი აუზში მეგობრების გადასარჩენად ჩავიდა და ელექტროტრავმა მიიღო, რის შედეგადაც გარდაიცვალა. კიდევ ორი ბავშვი — ანდრია ლორთქიფანიძე და ლაზარე ლობჟანიძე კი დაშავდა.

2023 წელს სასამართლომ 9 პირიდან 8 დამნაშავედ ცნო. "გრინსერვისი+"-ის დირექტორს, ლაშა ფურცხვანიძეს 6 წლით პატიმრობა მიესაჯა, მერიის გარემოს დაცვის საქალაქო სამსახურის უფროსის მოადგილეს, გიორგი ვახტანგიშვილის — 3 წლით, დევი კახოიძეს — 3 წლით, ნუგზარ ქიტიაშვილს — 3.6 წლით, დავით თუშიშვილი — 3.6 წლით, გიორგი გობეჯიშვილს — 4 წლით, ლაშა ჭიღიტაშვილს —3 წლით და ბექა მურღვლიანს — 3 წლით, ვალერი გობეჯიშვილი კი გამართლდა.